വാടാനപ്പള്ളി: എ.ടി.എം കൗണ്ടറില്‍ മറന്ന് വെച്ച ഐഫോണ്‍ യുവാവിന് തിരികെ നല്‍കി പഞ്ചായത്തംഗവും സുഹൃത്തും മാതൃകയായി. ഞായറാഴ്ച്ച ഉച്ചക്ക് രണ്ടിന് ഏങ്ങണ്ടിയൂര്‍ അഞ്ചാംകല്ലിലെ സൗത്ത് ഇന്ത്യന്‍ ബാങ്കിന്റെ എ.ടി.എം കൗണ്ടറില്‍ പണമെടുക്കാന്‍ കയറിയപ്പോഴാണ് ചാവക്കാട് സ്വദേശിയായ ഇജാസ് നാസറിന്റെ ഐ ഫോണ്‍ സെവന്‍ മറന്ന് വെച്ചത്. അബൂദാബിയിലേക്ക് പോകാനായി നെടുംബാശ്ശേരി എയര്‍പ്പോര്‍ട്ടിലേക്ക് പോകുന്ന വഴി വലപ്പാട് എത്തിയപ്പോഴാണ് തന്റെ ഫോണ്‍ നഷ്ടപ്പെട്ട വിവരം ഇജാസ് അറിയുന്നത്. ഈ സമയം എ.ടി.എം കൗണ്ടറില്‍ പണമെടുക്കാനെത്തിയ ഡി.സി.സി മെംബറും ഏങ്ങണ്ടിയൂര്‍ ഗ്രാമപഞ്ചായത്ത് അംഗവുമായ ഇര്‍ഷാദ് കെ. ചേറ്റുവയും സുഹൃത്ത് ഷെഫീക്ക് ബക്കറുമാണ് കൗണ്ടറിന്റെ മുകളിലിരിക്കുന്ന ഫോണ്‍ കണ്ടത്. ഉടനെ വാടാനപ്പള്ളി സബ് ഇന്‍സ്‌പെക്ടര്‍ ശ്രീജിത്തിനെ വിവരമറിയിക്കുകയും അദ്ദേഹത്തിന്റെ നിര്‍ദ്ദേശ പ്രകാരം ഫോണ്‍ പൊലിസിന് കൈമാറുകയും ചെയ്തു. ഫോണിലേക്ക് ഉടമ വിളിച്ചതിനെ തുടര്‍ന്ന് വാടാനപ്പള്ളി സ്റ്റേഷനിലേക്ക് ഉടമയോട് എത്താന്‍ ആവശ്യപ്പെടുകയും പൊലിസിന്റെ സാന്നിധ്യത്തില്‍ ഫോണ്‍ കൈമാറുകയും ചെയ്തു.