എരുമപ്പെട്ടി: കോണ്‍ഗ്രസ് പഞ്ചായത്ത് ഭരണസമിതിയും ബി.ജെ.പിയും തമ്മില്‍ അവിശുദ്ധ കൂട്ട്‌കെട്ടന്ന ആരോപണം പാര്‍ട്ടിക്കുള്ളില്‍ കലാപത്തിന് തിരികൊളുത്തിയ രിക്കുന്നു. അതേ സമയം ആരോപണത്തിന് മറുപടി പറയാന്‍ മാധ്യമങ്ങളെ കാണുന്നതില്‍ ഗ്രാമപഞ്ചായത്ത് പ്രസിഡണ്ടിന് പാര്‍ട്ടി നേതൃത്ത്വത്തിന്റെ കൂച്ചുവിലങ്ങ്. പ്രസിഡന്റ് ഇന്നലെ നടത്താനിരുന്ന വാര്‍ത്താ സമ്മേളനം ഡി.സി.സി. ഇടപ്പെട്ട് തടഞ്ഞു. കോണ്‍ഗ്രസ് ബ്ലോക്ക് കമ്മറ്റിയുടെ ആവശ്യപ്രകാരം ഡി.സി.സി.പ്രസിഡന്റ് തടഞ്ഞുവെന്നാണ് അറിയുന്നത്.പാര്‍ട്ടി നേതൃത്വവും പഞ്ചായത്ത് ഭരണ നേതൃത്വവും തമ്മിലുള്ള അഭിപ്രായ വ്യത്യാസം പുറത്ത് വരുമെന്ന ഭയപ്പാടാണ് പഞ്ചായത്ത് പ്രസിഡന്റിനെ മാധ്യമങ്ങളില്‍ നിന്ന് അകറ്റി നിര്‍ത്താനുള്ള നടപടിക്ക് പുറകിലുള്ളതെന്ന് പറയപ്പെടുന്നു . ആരോപണങ്ങളെ പഞ്ചായത്ത് ഭരണസമിതി എതിര്‍ക്കാത്തത് പാര്‍ട്ടി പ്രവര്‍ത്തകരുടെ പ്രതിഷേധത്തിന് ഇടയാക്കിയിട്ടുണ്ട് . വാര്‍ത്താ സമ്മേളനം നടത്തണമെന്ന മണ്ഡലം കമ്മറ്റിയുടെ തിരുമാനം ബ്ലോക്ക്, ജില്ലാ നേതൃത്വങ്ങള്‍ അട്ടിമറിച്ചതും പ്രവര്‍ത്തകരിലും ഒരു വിഭാഗം നേതാക്കളിലും അതൃപ്തിയുണ്ടാക്കി. സി.പി.എം .പ്രതിനിധിയായ നാലാം വാര്‍ഡ് മെമ്പര്‍ ഉയര്‍ത്തിയ ആരോപണങ്ങള്‍ മാധ്യമങ്ങള്‍ വാര്‍ത്തയാക്കിയിരുന്നു.എന്നാല്‍ ആരോപണങ്ങള്‍ക്ക് മറുപടി പറയാന്‍ ഇന്നലെ പ്രസിഡണ്ട് വിളിച്ച വാര്‍ത്താ സമ്മേളനത്തില്‍ നിന്നും മണിക്കൂറുകള്‍ മാത്രം ശേഷിക്കേ പിന്‍മാറിയ നടപടിയാണ് ഇപ്പോള്‍ വിവാദമായിരിക്കുന്നത്. അതേ സമയം പാര്‍ട്ടിയും പഞ്ചായത്ത് ഭരണസമിതിയും തമ്മില്‍ അഭിപ്രായ വ്യത്യാസം ഉണ്ടെന്ന പ്രചാരണവും ബി.ജെ.പിയുമായി കൂട്ടുകെട്ടുണ്ടെന്ന ആരോപണവും അടിസ്ഥാന രഹിതവും രാഷ്ട്രീയ പ്രേരിതവുമാണെന്ന് മണ്ഡലം പ്രസിഡന്റ് എം.കെ.ജോസ് അറിയിച്ചു.കുട്ടഞ്ചേരി ഭരണിച്ചിറയിലെ മണ്ണെടുപ്പില്‍ സി.പി.എം നേതാവും വാര്‍ഡ് മെമ്പറുമായ വി.സി.ബിനോജ് മാസ്റ്റര്‍ക്കെതിരെ ബി.ജെ.പി.ഉന്നയിച്ച അഴിമതി ആരോപണം മറച്ചുവെക്കാനാണ് പഞ്ചായത്ത് ഭരണസമിതിക്കെതിരെ സി.പി.എം.നുണപ്രചരണങ്ങള്‍ നടത്തുന്നതെന്നും മണ്ഡലം കമ്മറ്റി വാര്‍ത്ത കുറിപ്പിലൂടെ അറിയിച്ചു.