പേരൂര്‍ക്കട: നെട്ടയം-കാച്ചാണി റോഡില്‍ ഇലക്ട്രിക് ലൈനിനു മുകളില്‍ തെങ്ങുവീണു ഒരുമണിക്കൂറോളം ഗതാഗതം തടസ്സപ്പെട്ടു. ഇന്നലെ ഉച്ചയ്ക്കായിരുന്നു സംഭവം. കാച്ചാണി റോഡിലെ പ്രധാന ട്രാന്‍സ്‌ഫോമറിനു സമീപം താമസിക്കുന്ന ജേര്‍ണലിസ്റ്റ് കിഷോറിന്റെ വീട്ടുവളപ്പില്‍ നിന്ന തെങ്ങാണ് നിലം പൊത്തിയത്.
മരം വീണതോടെ ലൈന്‍ മുറിഞ്ഞുമാറുകയും വൈദ്യുതബന്ധം നിലയ്ക്കുകയും ചെയ്തു. വാഹനഗതാഗതവും തടസപ്പെട്ടു. ചെങ്കല്‍ച്ചൂളയില്‍ നിന്ന് സ്റ്റേഷന്‍ ഓഫിസര്‍ സി. അശോക്കുമാറിന്റെ നേതൃത്വത്തിലുള്ള സംഘമെത്തിയാണ് മരം മുറിച്ചുനീക്കിയത്. ഇലക്ട്രിസിറ്റി അധികൃതരെത്തി ഇലക്ട്രിക് ലൈന്‍ പുനഃസ്ഥാപിച്ചു.