പേരൂര്‍ക്കട: ഓട്ടോറിക്ഷയില്‍ കറങ്ങിനടന്ന് ലാപ്‌ടോപ്പുകളും മൊബൈല്‍ ഫോണുകളും മോഷ്ടിക്കുന്ന വിരുതനെ മ്യൂസിയം പൊലിസ്  അറസ്റ്റുചെയ്തു. ചെമ്പഴന്തി അണിയൂര്‍ ക്ഷത്രത്തിനു പിറകുവശം താമസിക്കുന്ന സനോഫര്‍ (18) ആണ് പിടിയിലായത്.
ഓട്ടോറിക്ഷാ ഡ്രൈവറെന്ന വ്യാജേന കറങ്ങി നടന്ന് ആറു വ്യത്യസ്ത സ്ഥലങ്ങളില്‍നിന്നാണ് സനോഫര്‍ ഇലക്‌ട്രോണിക് സാധനങ്ങള്‍ കവര്‍ന്നത്. മൂസിയം സ്റ്റേഷന്‍ പരിധിയിലെ പി.എം.ജി ലൂര്‍ദ്ദ്മാതാ പള്ളി ഹോസ്റ്റലില്‍ നിന്നും സിവില്‍ സര്‍വ്വീസിനു പഠിക്കുന്ന ജോസഫ് ജെയിംസിന്റെ ലാപ്‌ടോപ്പും മൊബൈല്‍ ഫോണും കവര്‍ന്ന കേസുമായി ബന്ധപ്പെട്ട് സിറ്റി ഷാഡോ ടീം നടത്തിയ അന്വേഷണത്തിലാണ് പ്രതി പിടിയിലായത്. പോങ്ങുമ്മൂട് ചെറുവയ്ക്കല്‍ പമ്പ് ഹൗസിന് എതിര്‍വശം അനന്തുഅയ്യപ്പന്റെ വീട്ടില്‍ നിന്നും ലാപ്‌ടോപ്, മരപ്പാലം എക്‌സൈസ് ഓഫീസിനടുത്തുള്ള അനീഷ് കൃഷണന്റെ വീട്ടില്‍ നിന്നും വിലകൂടിയ ലാപ്‌ടോപ്പ്,  മൊബൈല്‍ഫോണ്‍, ഗാന്ധിപുരം ചെമ്പഴന്തി ലൈനില്‍ താമസിക്കുന്ന നെവിന്‍ ലിവിംഗ്സ്റ്റണിന്റെ വീട്ടില്‍നിന്ന് മറ്റൊരു ലാപ്‌ടോപ്പ്, കാര്യവട്ടം കുരിശ്ശടി ജംഗ്ഷനില്‍ നജീബ് യഹിയയുടെ വീട്ടില്‍ നിന്നും കമ്പ്യൂട്ടര്‍ ലാപ്‌ടോപ്പ്  എന്നിവ മോഷ്ടിച്ചിട്ടുണ്ട്. മോഷണവസ്തുക്കള്‍ പ്രതി വില്‍പ്പന നടത്തിയിരുന്നത് ബീമാപ്പള്ളിയിലെ വിവിധ കടകളില്‍നിന്നാണ്. ഇവ പോലീസ് കണ്ടെത്തി.
പൂന്തുറ, ഫോര്‍ട്ട് സ്റ്റേഷന്‍ പരിധിയില്‍ സ്വര്‍ണ്ണമാലയും വളകളും മൊബൈലുകളും കവര്‍ന്നകേസില്‍ സനോഫര്‍ പ്രതിചേര്‍ക്കപ്പെട്ടിട്ടുണ്ട്. സിറ്റി പോലീസ് കമ്മീഷണര്‍ സ്പര്‍ജന്‍കുമാറിന്റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.