തൊടുപുഴ: രണ്ടു ദിവസമായി പെയ്യുന്ന കനത്ത മഴയില്‍ ഇടുക്കി ജില്ലയുടെ വിവിധ മേഖലകളില്‍ കനത്ത നാശനഷ്ടം. ശക്തമായ കാറ്റില്‍ ഏക്കര്‍ കണക്കിന് സ്ഥലത്തെ കൃഷി നശിച്ചു.
ഓണത്തിന് വെട്ടാന്‍ നിര്‍ത്തിയിരുന്ന ഏത്തവാഴ കൃഷി വ്യാപകമായി നശിച്ചു. കട്ടപ്പന, കാഞ്ചിയാര്‍, ഇരട്ടയാര്‍ മേഖലകളില്‍ കനത്ത മണ്ണിടിച്ചിലുണ്ടായി.
കല്ലാര്‍കുട്ടി, ലോവര്‍പെരിയാര്‍ അണക്കെട്ടുകള്‍ തുറന്നുവിട്ടു. ലോവര്‍പെരിയാറില്‍ 11.2 സെ.മീ. മഴയാണ് രേഖപ്പെടുത്തിയത്. പീരുമേട്ടില്‍ ദേശീയപാത 183ല്‍ മത്തായി കൊക്കയ്ക്കു സമീപവും മണ്ണിടിഞ്ഞുവീണു ഗതാഗതം തടസപ്പെട്ടു.
കനത്ത മഴയിലാണു രാത്രി പത്തോടെ റോഡിലേക്കു മണ്ണിടിഞ്ഞു വീണത്. ഒരു മണിക്കൂറോളം ഗതാഗതം തടസ്സപ്പെട്ടു.
മണ്ണിടിച്ചില്‍ ഉണ്ടായപ്പോള്‍ റോഡില്‍ വാഹനങ്ങള്‍ ഇല്ലാതിരുന്നതിനാല്‍ അപകടം ഒഴിവായി. ഇതിന് 20 മീറ്റര്‍ ദൂരത്തില്‍ 2014 ല്‍ മണ്ണിടിച്ചില്‍ ഉണ്ടായിരുന്നു.
തൊടുപുഴയില്‍ ഇടിമിന്നിലേറ്റു ചീനിക്കുഴി കിഴക്കുംപാടം വഴിക്കപുത്തന്‍പുരയില്‍ കരുണന്റെ വീടിനു നാശനഷ്ടമുണ്ടായി. ഭിത്തി വിണ്ടുകീറി. വയറിങ് പൂര്‍ണമായും കത്തിനശിച്ചു. വീടിന്റെ വരാന്തയിലും പൊട്ടലുണ്ടായി. ഇവരുടെ വളര്‍ത്തുനായ മിന്നലേറ്റു ചത്തു.
ജില്ലയിലെ പുഴകളും അരുവികളും കരകവിഞ്ഞൊഴുകുകയാണ്. കഴിഞ്ഞ 18 നു മാത്രം മാങ്കുളത്തു പെയ്തത് 11.5 സെന്റീമീറ്റര്‍ മഴയാണ്.
കാട്ടാനകള്‍ വെളളം കുടിക്കാനെത്തുന്ന ആനക്കുളം പുഴയില്‍ ജലനിരപ്പ് ഉയര്‍ന്നു. മീന്‍കുത്തി, കോഴിയിള, വെള്ളച്ചാട്ടങ്ങളില്‍ വന്‍ ജലസാനിധ്യമാണുള്ളത്. വെള്ളച്ചാട്ടം ആസ്വദിക്കുന്നതിനായി അനവധി സഞ്ചാരികളും ഇവിടെയെത്തുന്നുണ്ട്. പുഴ നിറഞ്ഞൊഴുകുമ്പോഴും കാട്ടാനകളെത്തി പുഴയിലെ വെള്ളം കുടിക്കാന്‍ ശ്രമം നടത്തുന്നുണ്ടെന്നു പ്രദേശവാസികള്‍ പറഞ്ഞു.
ഇടുക്കി അണക്കെട്ടിലെ ജലനിരപ്പ് 2331.981 അടിയായി ഉയര്‍ന്നു.
അണക്കെട്ടിന്റെ വൃഷ്ടിപ്രദേശത്ത് 5.84 സെ.മീ. മഴ രേഖപ്പെടുത്തി. 17.157 ദശലക്ഷം യൂനിറ്റ് വൈദ്യുതിക്കുള്ള വെള്ളം ഒഴുകിയെത്തി.