അമ്പലപ്പുഴ: അമ്പലപ്പുഴയെ ഉല്‍സവ ലഹരിയിലാക്കി മിഴാവ് 2017 സാംസ്‌ക്കാരികോല്‍സവത്തിന് അമ്പലപ്പുഴ ഒരുങ്ങുന്നു. സാംസ്‌ക്കാരിക വകുപ്പ്,
ജില്ലാ ടൂറിസം പ്രമോഷന്‍ കൗണ്‍സില്‍ എന്നിവയുടെ സഹകരണത്തോടെ അമ്പലപ്പുഴ കുഞ്ചന്‍ നമ്പ്യാര്‍ സ്മാരക സമിതിയാണ് സെപ്തംബര്‍ 7,8,9 തിയതികളില്‍ അമ്പലപ്പുഴ കെ കെ കുഞ്ചു പിള്ള സ്മാരക ഹയര്‍ സെക്കന്‍ഡറി സ്‌കൂളില്‍ മിഴാവ് 2017 സംഘടിപ്പിക്കുന്നത്.
കുഞ്ചന്‍ നമ്പ്യാര്‍ സ്മാരകത്തിന്റെ ഒരു വര്‍ഷം നീണ്ടു നില്‍ക്കുന്ന ആഘോഷ പരിപാടിയുടെ ഭാഗമായാണ് സാംസ്‌ക്കാരികോത്സവം നടത്തുന്നത്. 31-ന് മെഗാ തിരുവാതിരയോടെയാണ്‌സാംസ്‌ക്കാരികോല്‍സവത്തിന് തുടക്കമാകുന്നത്.
പൂക്കളം, പെയിന്റിങ് മത്സരവും ഇതിന്റെ ഭാഗമായി സംഘടിപ്പിക്കും.
സസ്യ പുഷ്പഫലപ്രദര്‍ശനം, കാര്‍ഷിക ഉപകരണ പ്രദര്‍ശനം, ചലചിത്ര അക്കാഡമിയുടെ മിനി തിയറ്റര്‍, വാണിജ്യ വ്യവസായ പ്രദര്‍ശനം, കരകൗശലപ്രദര്‍ശനം, പുസ്തക പ്രദര്‍ശനം, കാര്‍ണിവല്‍ എന്നിവ സാംസ്‌ക്കാരികോല്‍സവത്തിന്റെ ഭാഗമായി ഒരുക്കിയിട്ടുണ്ട്.
കൂടാതെ കലാമത്സരങ്ങള്‍, സര്‍ഗ സംവാദം, നാടന്‍പാട്ട് ദൃശ്വോത്സവം, നാടകം സാംസ്‌ക്കാരിക ഘോഷയാത്ര എന്നിവയും സംഘടിപ്പിക്കും. എല്ലാ ദിവസവും തുള്ളല്‍ അവതരണവും നടക്കും.
ഒപ്പം 12 സംസ്ഥാനങ്ങളിലെ 150 ഓളം കലാകാരന്‍മാര്‍ പങ്കെടുക്കുന്ന വ്യത്യസ്തമായ കലാരൂപവും നടക്കും. പരിപാടിയുടെ വിജയത്തിനായി മന്ത്രിമാരായ ജി.സുധാകരന്‍, എ കെ ബാലന്‍, കെ സി വേണുഗോപാല്‍ എം പി, ജില്ലാ പഞ്ചായത്ത് പ്രസി: ജി.വേണുഗോപാല്‍, ചലചിത്ര സംവിധായകന്‍ ഫാസില്‍ എന്നിവര്‍ രക്ഷാധികാരികളും ഡോ: പള്ളിപുറം മുരളി ചെയര്‍മാനും എച്ച്.സലാം ജനറല്‍ കണ്‍വീനറുമായ സ്വാഗത സംഘം പ്രവര്‍ത്തനമാരംഭിച്ചു.