തൃശൂര്‍: വിബ്ജിയോര്‍ രാജ്യാന്തര ചലച്ചിത്രമേളയ്ക്ക് നാളെ തൃശൂര്‍ സംഗീത നാടക അക്കാദമിയില്‍ തുടക്കം കുറിക്കും. വൈകീട്ട് 5.30 ന് അശോക് വാജ്‌പേയി നടത്തുന്ന സി.ശരത് ചന്ദ്രന്‍ അനുസ്മരണ പ്രഭാഷണത്തോടെ മഴവില്‍മേള ആരംഭിക്കും. 24 വൈകീട്ട് അഞ്ചിന് സി.എന്‍ ജയദേവന്‍ എം.പി ചലച്ചിത്രമേള ഔപചാരികമായി ഉദ്ഘാടനം ചെയ്യും.
ഉദ്ഘാടന സമ്മേളനത്തില്‍ കേരള സംസ്ഥാന ചലച്ചിത്ര അക്കാദമി വൈസ് ചെയര്‍പേഴ്‌സണ്‍ ബീനാ പോള്‍, കലാ ചരിത്രകാരനും നിരൂപകനുമായ ശിവജി പണിക്കര്‍, ചത്തീസ്ഗഢിലെ ആദിവാസികളുടെ ഇടയില്‍ പ്രവര്‍ത്തിക്കുന്നവരും ഡോക്യുമെന്ററി സംവിധായകരുമായ മേഘ്‌നാഥ്, ബിജു ടോപ്പോ, കക്കൂസ് എന്ന ഡോക്യുമെന്ററിയുടെ സംവിധായിക ദിവ്യ ഭാരതി തുടങ്ങിയവര്‍ വിശിഷ്ടാതിഥികളാകും.
തൃശൂര്‍ മേയര്‍ അജിത ജയരാജന്‍, വിബ്ജിയോര്‍ ചെയര്‍പേഴ്‌സണ്‍ രാജാജി മാത്യു എന്നിവരും പങ്കെടുക്കും. സി. ശരത്ചന്ദ്രന്‍ അനുസ്മരണ പ്രഭാഷണത്തിന് ശേഷം നടക്കുന്ന കവികളുടെ സമ്മേളനത്തില്‍ അശോക് വാജ്‌പേയി ദളിത് കവിയും ഫെമിനിസ്റ്റുമായ സുകീര്‍ത്ത റാണി, പി.എന്‍ ഗോപീകൃഷ്ണന്‍, അനിത തമ്പി, അന്‍വര്‍ അലി, കെ.ആര്‍ ടോണി പങ്കെടുക്കും.
സ്ത്രീത്വത്തെ അപമാനിച്ച ഒരു ജഡ്ജിനെതിരേ 20 വര്‍ഷമായി തീരുമാനമാകാത്ത കേസുമായി കോടതി കയറിയിറങ്ങുന്ന രണ്ടു സ്ത്രീകളുടെ ജീവിതം പകര്‍ത്തിയ 'സൈലന്‍സ് ഇന്‍ ദ കോര്‍ട്ട്' എന്ന ചിത്രമാണ് വിമതം പ്രതിപാദ്യവിഷയമാക്കിയ 12ാം മഴവില്‍മേളയില്‍ ഉദ്ഘാടന ചിത്രം.
ഇന്റര്‍നാഷണല്‍ അസോസിയേഷന്‍ ഓഫ് വിമന്‍ ഇന്‍ റേഡിയോ ആന്‍ഡ് ടെലിവിഷന്‍ , ബന്ധു പ്രസാദ്, നീലോത്പല്‍ മജുംദാര്‍, ആര്‍.പി അമുതന്‍ എന്നിവര്‍ തെരഞ്ഞെടുത്ത സിനിമകളടങ്ങുന്ന ക്യുറേറ്റഡ് പാക്കേജ്, ഫെസ്റ്റിവല്‍ ഡയറക്ടര്‍ പാക്കേജ്, ഫോക്കസ് ഓഫ് ദ ഇയര്‍ പാക്കേജ്, റിട്രോസ്‌പെക്ടീവ് പാക്കേജ്, മലയാളം ഷോര്‍ട്ട് ഫിലിമുകളുടെ മാത്രമായ കേരള സ്‌പെക്ട്രം, തുടങ്ങിയ വിഭാഗങ്ങളിലായി അമ്പതോളം ചലച്ചിത്രങ്ങളാണ് മഴവില്‍മേളയില്‍ പ്രദര്‍ശിപ്പിക്കുന്നത്.
നാല് ദിവസം നീളുന്ന മഴവില്‍മേളയില്‍ പതിനഞ്ചോളം രാജ്യങ്ങളില്‍ നിന്നുമുള്ള സിനിമകളാണ് പ്രദര്‍ശിപ്പിക്കുന്നത്. കേരളത്തിന്നകത്തും പുറത്തുനിന്നുമെത്തുന്ന വിദഗ്ധര്‍ പങ്കെടുക്കുന്ന ചര്‍ച്ചകളും മുഖാമുഖം പരിപാടികളും ഇതിനോടൊപ്പം സംഘടിപ്പിക്കും. മഴവില്‍മേളയ്‌ക്കൊപ്പം തന്നെ കെ.ടി.ഡി.സി ഹാളില്‍ സംഘടിപ്പിക്കപ്പെടുന്ന ഫോട്ടോഗ്രഫി വര്‍ക്ക്‌ഷോപ്പും ഉണ്ട്.
കൂടുതല്‍ വിവരങ്ങള്‍ക്കും ഡെലിഗേറ്റ് പാസ്സിനും ംംം.്ശയഴ്യീൃളശഹാ.ീൃഴ സന്ദര്‍ശിക്കുകയോ 98094770589567839494 എന്ന നമ്പറില്‍ ബന്ധപ്പെടുകയോ ചെയ്യണം. ഗ്രൂപ്പായി എത്തുന്ന വിദ്യാര്‍ഥികള്‍ക്ക് പ്രവേശനം സൗജന്യമാണ്.