വടക്കാഞ്ചേരി: സ്റ്റേറ്റ് ബാങ്ക് ഓഫ് ഇന്ത്യയുടെ ഇടപാടുകാരുടെ ബാങ്ക് അക്കൗണ്ട് നമ്പറും മറ്റ് വിവരങ്ങളും ശേഖരിച്ച് അക്കൗണ്ടില്‍ നിന്ന് പണം തട്ടുന്ന സംഘം വടക്കാഞ്ചേരി മേഖലയില്‍ വിലസുന്നു. ഇതിനകം തന്നെ ഒന്നിലധികം പേര്‍ക്ക് ആയിരങ്ങള്‍ നഷ്ടപ്പെട്ട സ്ഥിതിയാണ്. ബാങ്ക് ഉദ്യോഗസ്ഥരെന്ന വ്യാജേനയാണ് ഇടപാടുകാരെ ബന്ധപ്പെടുന്നത് . ഇടപാടുകള്‍ സുരക്ഷിതമാക്കുന്നതിന് വേണ്ടിയുള്ള ബാങ്കിന്റെ പ്രത്യേക പദ്ധതിയുടെ ഭാഗമായാണ് അന്വേഷണമെന്നും അറിയിക്കും. ഇതില്‍ കുടുങ്ങുന്നവരില്‍ നിന്ന് അകൗണ്ട് നമ്പറും എ.ടി.എം കോഡ്, പിന്‍ നമ്പര്‍ എന്നിവയും ശേഖരിയ്ക്കും.
ഇതിന് ശേഷം അക്കൗണ്ടില്‍ നിന്ന് പണം പിന്‍വലിയ്ക്കുകയാണ് ചെയ്യുന്നത്. 77 39 04 05 96 എന്നീ നമ്പറുകളില്‍ നിന്നാണ് ഫോണുകള്‍ എത്തുന്നത്. കഴിഞ്ഞ ദിവസം എങ്കക്കാട്, ഓട്ടുപാറ മേഖലയിലെ നിരവധി പേര്‍ക്കാണ് ഫോണ്‍ കോള്‍ എത്തിയത്. ഒരു യുവാവിന്റെ 40,000 രൂപ നഷ്ടപ്പെടുകയും ചെയ്തു. തട്ടിപ്പ് വ്യാപകമായതോടെ പൊലിസ് അന്വേഷണവും ആരംഭിച്ചിട്ടുണ്ട്. സൈബര്‍ സെല്ലിന്റെ സഹായത്തോടെ അന്വേഷണം നടത്തുന്നതിനാണ് തീരുമാനം. ഏതെങ്കിലും ബാങ്ക് ഉദ്യോഗസ്ഥര്‍ക്ക് സംഭവവുമായി ബന്ധമുണ്ടോയെന്നും അന്വേഷണ വിധേയമാക്കും.