ലാഹോര്‍: അന്താരാഷ്ട്ര ക്രിക്കറ്റിലേക്ക് മടങ്ങി വരവ് വേഗത്തിലാക്കാനുള്ള ശ്രമങ്ങള്‍ പാകിസ്താന്‍ ഊര്‍ജിതമാക്കി.
2009ല്‍ ശ്രീലങ്കന്‍ ക്രിക്കറ്റ് താരങ്ങള്‍ സഞ്ചരിച്ച ബസിന് നേരെ തീവ്രവാദ ആക്രമണമുണ്ടായ ശേഷം മറ്റ് ടീമുകള്‍ പാകിസ്താനില്‍ കളിക്കാന്‍ വിസമ്മതിച്ചതിനെ തുടര്‍ന്നുണ്ടായ പ്രതിസന്ധി കാര്യമായി പരിഹരിക്കാന്‍ ഇതുവരെ സാധിച്ചിരുന്നില്ല.
അതിനുള്ള മാറ്റമെന്ന നിലയില്‍ അടുത്ത മാസം ലോക ഇലവന്‍ പര്യടനവും ഒക്ടോബറില്‍ ശ്രീലങ്കന്‍ ടീമുമായുള്ള ഒരേയൊരു ടി20 മത്സരവും നവംബറില്‍ വെസ്റ്റിന്‍ഡീസ് ടീമിനെതിരായ ടി20 പരമ്പരയും തീരുമാനിച്ചതായി പാകിസ്താന്‍ ക്രിക്കറ്റ് ബോര്‍ഡ് ചെയര്‍മാന്‍ നജാം സേതി വ്യക്തമാക്കി. കഴിഞ്ഞ എട്ട് വര്‍ഷമായി പാകിസ്താന്റെ മത്സരങ്ങളെല്ലാം യു.എ.ഇയിലാണ് നടത്തുന്നത്.
കഴിഞ്ഞ രണ്ട് സീസണുകളിലായി പാകിസ്താന്‍ സൂപ്പര്‍ ലീഗ് ടി20 മത്സരങ്ങള്‍ നടത്തിയതിന്റെ ആത്മവിശ്വാസത്തിലാണ് അന്താരാഷ്ട്ര മത്സരങ്ങള്‍ സ്വന്തം മണ്ണില്‍ നടത്താനുള്ള ബോര്‍ഡിന്റെ ശ്രമങ്ങള്‍.