മലപ്പുറം: കാളമ്പാടി മഖാമില്‍ അന്ത്യ വിശ്രമം കൊള്ളുന്ന അബ്ദുല്‍ അലി കോമു മുസ്‌ലിയാര്‍, കോട്ടുമല അബൂബക്കര്‍ മുസ്‌ലിയാര്‍, കാളമ്പാടി മുഹമ്മദ് മുസ്‌ലിയാര്‍ എന്നിവരുടെ പേരിലുള്ള ഉറൂസ് ശനിയാഴ്ച തുടങ്ങും. വൈകിട്ട് ആറിന് സമസ്ത മുശാവറ അംഗം കോട്ടുമല മൊയ്തീന്‍ കുട്ടി മുസ്‌ലിയാര്‍ പതാക ഉയര്‍ത്തും. സമസ്ത വിദ്യാഭ്യാസ ബോര്‍ഡ് ജനറല്‍ സെക്രട്ടറി എം.ടി അബ്ദുല്ല മുസ്‌ലിയാര്‍ സിയാറത്തിന് നേതൃത്വം നല്‍കും. ഏഴിന് നടക്കുന്ന ഉദ്ഘാടന സമ്മേളനം കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി ഉദ്ഘാടനം ചെയ്യും. സമസ്ത മുശാവറ അംഗം ഹൈദര്‍ ഫൈസി പനങ്ങാങ്ങര അധ്യക്ഷനാവും. സ്വാലിഹ് ബത്തേരി മതപ്രഭാഷണം നടത്തും.
ഞായറാഴ്ച പത്തിന് 'കസേര നിസ്‌കാരം' എന്ന വിഷയത്തില്‍ നടക്കുന്ന ഫിഖ്ഹ് കോണ്‍ഫറന്‍സ് സമസ്ത പ്രസിഡന്റ് സയ്യിദ് മുഹമ്മദ് ജിഫ്്‌രി മുത്തുക്കോയ തങ്ങള്‍ ഉദ്ഘാടനം ചെയ്യും. എം.ടി അബൂബക്കര്‍ ദാരിമി  വിഷയമവതരിപ്പിക്കും. ഉച്ചയ്ക്ക് രണ്ടിനു പൂര്‍വ വിദ്യാര്‍ഥി സംഗമവും, മൂന്നിന് ഏരിയ ത്വലബാ മീറ്റും നടക്കും. അഞ്ചിന് മൗലീദ് പാരായണവും നടക്കും.
വൈകിട്ട് ഏഴിന് നടക്കുന്ന അനുസ്മരണ സമ്മേളനം സമസ്ത സെക്രട്ടറി എം.ടി അബ്ദുല്ല മുസ്‌ലിയാരുടെ അധ്യക്ഷതയില്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും.
സമസ്ത ട്രഷറര്‍ സി.കെ.എം സ്വാദിഖ് മുസ്‌ലിയാര്‍, പി. കുഞ്ഞാണി മുസ്‌ലിയാര്‍, വാക്കോട് മൊയ്തീന്‍കുട്ടി ഫൈസി, അബ്ദുല്‍ ഹമീദ് ഫൈസി അമ്പലക്കടവ്, പി. ഉബൈദുല്ല എം.എല്‍.എ, സുലൈമാന്‍ ഫൈസി ചുങ്കത്തറ എന്നിവര്‍ പ്രസംഗിക്കും. എട്ടുമണിക്ക് നടക്കുന്ന മജ്‌ലിസുന്നൂറിന് ഹസന്‍ സഖാഫി പൂക്കോട്ടൂരും ദിക്ര്‍ ദുആ സമ്മേളനത്തിന് ഏലംകുളം ബാപ്പു മുസ്‌ലിയാരും നേതൃത്വം നല്‍കും.