ചേളാരി: സമസ്തയുടെ 9760 മദ്‌റസകളില്‍ ജംഇയ്യത്തുല്‍ മുഅല്ലിമീന്‍ 'സ്‌നേഹവീട്' പദ്ധതിയൊരുക്കുന്നു. മദ്‌റസാ പഠനം മികവുറ്റതാക്കാന്‍ തയാറാക്കിയ തദ്‌രീബ് പദ്ധതിയുടെ ഭാഗമായാണ് 'സ്‌നേഹവീട്' പ്രഖ്യാപിച്ചിരിക്കുന്നത്. കുടുംബ ബന്ധങ്ങളും സ്‌നേഹവായ്പുകളും കുറഞ്ഞുവരുന്ന ഇക്കാലത്ത് സ്‌നേഹബന്ധങ്ങളുടെ മഹിമ കുട്ടികളിലും രക്ഷിതാക്കളിലും എത്തിക്കുന്നതാണ്  പദ്ധതി.  
കുടുംബങ്ങളില്‍ സ്‌നേഹപ്രകടനങ്ങളുടെ ഊഷ്മളത പ്രചരിപ്പിക്കുന്ന ഈ രക്ഷാകര്‍തൃപരിപാടി എല്ലാ മദ്‌റസകളിലും നടപ്പിലാക്കും.
വിപുലമായ രക്ഷാകര്‍തൃ സംഗമങ്ങള്‍ നടത്തിയായിരിക്കും 'സ്‌നേഹവീട്' അവതരിപ്പിക്കുക. ഇതിനായി പ്രത്യേകം പരിശീലനം നല്‍കിയ മുദര്‍രിബുമാരെ നിയമിച്ചിട്ടുണ്ട്. സംസ്ഥാനതല ഉദ്ഘാടനം ഇന്ന് രാവിലെ 10ന് മലപ്പുറം വെളിമുക്ക് മുഈനുല്‍ ഇസ്‌ലാം മദ്‌റസയില്‍ നടക്കും.
സമസ്ത ട്രഷറര്‍ സി.കെ.എം. സ്വാദിഖ് മുസ്‌ലിയാരുടെ അധ്യക്ഷതയില്‍ ദാറുല്‍ ഹുദാ യൂനിവേഴ്‌സിറ്റി വൈസ് ചാന്‍സ്‌ലര്‍ ഡോ. ബഹാഉദ്ദീന്‍ മുഹമ്മദ് നദ്‌വി ഉദ്ഘാടനം ചെയ്യും. തദ്‌രീബ് സ്റ്റേറ്റ് ഡയറക്ടര്‍ എസ്.വി.മുഹമ്മദലി 'സ്‌നേഹവീട്' പ്രൊജക്ട് അവതരിപ്പിക്കും. എം.എ. ചേളാരി, അബ്ദുറഹിമാന്‍ മുസ്‌ലിയാര്‍ കൊടക്,  എം.എം. കുഞ്ഞാപ്പു മുസ്‌ലിയാര്‍ പ്രസംഗിക്കും.