തിരുവനന്തപുരം: ആരോഗ്യ മന്ത്രി കെ.കെ ശൈലജക്കെതിരേ പുതിയ ആരോപണവുമായി പ്രതിപക്ഷം രംഗത്ത്. കേരള ഹെല്‍ത്ത് റിസര്‍ച്ച് ആന്‍ഡ് വെല്‍ഫെയര്‍ സൊസൈറ്റി (കെ.എച്ച്.ആര്‍.ഡബ്ല്യൂ) എം.ഡിയുടെ നിയമനത്തില്‍ മന്ത്രി ഇടപെട്ടെന്നാണ് പുതിയ ആരോപണം.

നിയമനത്തില്‍ മന്ത്രി സ്വജനപക്ഷപാതിത്വം കാണിച്ചെന്നും അപേക്ഷ പോലും നല്‍കാത്തയാളെയാണ് നിയമിച്ചതെന്നും പ്രതിപക്ഷ നേതാവ് രമേശ് ചെന്നിത്തല പറഞ്ഞു. ഇതു സംബന്ധിച്ച വിവരാവകാശ രേഖയിലൂടെയാണ് വ്യക്തമായത്. മന്ത്രിയുടെ കത്തിന്റെ അടിസ്ഥാനത്തിലാണ് നിയമനം നടത്തിയത്. നിയമനം റദ്ദാക്കണമെന്നും മന്ത്രി ശൈലജ രാജിവെക്കണമെന്നും പ്രതിപക്ഷം ആവശ്യപ്പെട്ടു.

ബാലാവകാശ കമ്മീഷന്‍ അംഗത്തിന്റെ നിയമനവുമായി ബന്ധപ്പെട്ടുയര്‍ന്ന വിവാദങ്ങള്‍ക്ക് പിന്നാലെയാണ് പുതിയ ആരോപണവുമായി പ്രതിപക്ഷം രംഗത്തെത്തിയത്. മന്ത്രിയുടെ രാജിയില്‍ ഉറച്ചു നില്‍ക്കുകയാണ് പ്രതിപക്ഷം.