ലഖ്‌നൗ: ഉത്തര്‍പ്രദേശില്‍ വീണ്ടും ട്രെയിന്‍ പാളം തെറ്റി. അസംഗഡില്‍ നിന്ന് ഡല്‍ഹിയിലേക്ക് പോവുകയായിരുന്ന കൈഫിയാത്ത് ട്രെയിനിന്റെ പത്ത് കോച്ചുകളാണ് പാളം തെറ്റിയത്. അപകടത്തില്‍ 50ല്‍ അധികം പേര്‍ക്ക് പരുക്കേറ്റിട്ടുണ്ട്.
ഇന്നലെ പുലര്‍ച്ചെ 2.50ന് ഔരിയ ജില്ലയിലെ അക്കഹര്‍ദാ-പാത്ത ഗ്രാമങ്ങള്‍ക്കിടയില്‍ ലെവല്‍ക്രോസില്‍ വച്ചാണ് അപകടമുണ്ടായത്.
ലവല്‍ക്രോസില്‍ ഒരു ചരക്കുവാഹനവുമായി കൂട്ടിയിടിച്ചതിനെത്തുടര്‍ന്ന് 10 ബോഗികളാണ് പാളം തെറ്റിയതെന്ന് റെയില്‍വേ അറിയിച്ചു.
ദിവസങ്ങള്‍ക്ക് മുന്‍പ് മുസാഫര്‍ നഗറിനടുത്ത് പുരി-ഹരിദ്വാര്‍ എക്‌സ്പ്രസ് ട്രെയിന്‍ പാളം തെറ്റി 24 യാത്രക്കാര്‍ മരിക്കുകയും 150ഓളം പേര്‍ക്ക് പരുക്കേല്‍ക്കുകയും ചെയ്ത സംഭവത്തിന് പിന്നാലെയാണ് വീണ്ടും ട്രെയിന്‍ പാളം തെറ്റിയ സംഭവമുണ്ടായത്. അപകടമുണ്ടായ ഉടന്‍ തന്നെ ഔരിയ, എത്വ, കനൗജ് എന്നിവിടങ്ങളില്‍ നിന്ന് ദേശീയ ദുരന്ത നിവാരണ സേനയും പൊലിസും എത്തിയാണ് രക്ഷാപ്രവര്‍ത്തനം നടത്തിയത്. അലഹബാദില്‍ നിന്ന് മെഡിക്കല്‍ ട്രെയിനും സംഭവസ്ഥലത്ത് എത്തിയിരുന്നു.