സോഫിയ: മുന്‍ മാഞ്ചസ്റ്റര്‍ യുനൈറ്റഡ് ഇതിഹാസവും ബള്‍ഗേറിയന്‍ വെറ്ററന്‍ താരവുമായി ദിമിത്രി ബെര്‍ബറ്റോവ് ഐ.എസ്.എല്‍ നാലാം സീസണില്‍ കേരള ബ്ലാസ്റ്റേഴ്‌സിനായി കളത്തിലിറങ്ങും. കുറച്ച് ദിവസങ്ങളായി താരം ബ്ലാസ്റ്റേഴ്‌സിലെത്തുമെന്ന തരത്തില്‍ റിപ്പോര്‍ട്ടുകളുണ്ടായിരുന്നെങ്കിലും ക്ലബ് ഇപ്പോഴാണ് ഇതിഹാസ താരത്തിന്റെ വരവ് സ്ഥിരീകരിച്ചത്. ടോട്ടനം ഹോട്‌സ്പര്‍, മൊണാക്കോ, ബയര്‍ ലെവര്‍കൂസന്‍, സി.എസ്.കെ.എ മോസ്‌കോ ടീമുകള്‍ക്കായും കളിച്ചിട്ടുള്ള ബര്‍ബറ്റോവ് ഗ്രീക്ക് ക്ലബ് പി.എ.ഒ.കെ സലോനിക വിട്ടാണ് ബ്ലാസ്റ്റേഴ്‌സിനായി കളത്തിലിറങ്ങാനൊരുങ്ങുന്നത്. താരവുമായി ഒരു വര്‍ഷത്തെ കരാറാണ് ബ്ലാസ്റ്റേഴ്‌സ് ഒപ്പ് വച്ചത്.
ബള്‍ഗേറിയക്കായി ഏറ്റവും കൂടുതല്‍ ഗോള്‍ നേടിയ താരമാണ് ബെര്‍ബറ്റോവ്. 79 മത്സരങ്ങളില്‍ നിന്നായി 48 ഗോളുകളാണ് രാജ്യത്തിനായി താരം നേടിയത്. മാഞ്ചസ്റ്ററിനായി 108 മത്സരങ്ങള്‍ കളിച്ച 36 കാരനായ ബള്‍ഗേറിയന്‍ താരം 48 ഗോളുകളും നേടിയിട്ടുണ്ട്.
നാലാം സീസണിലേക്കായി കേരള ബ്ലാസ്റ്റേഴ്‌സ് ടീമിലെത്തിക്കുന്ന ഏഴാമത്തെ വിദേശ താരമാണ് ബെര്‍ബറ്റോവ്. എട്ട് വിദേശ താരങ്ങളേയാണ് ഓരോ ടീമിനും സ്വന്തമാക്കാന്‍ അനുവാദമുള്ളത്. ഇനി ഒരു വിദേശ താരത്തെ കൂടി കൊമ്പന്‍മാര്‍ക്ക് ടീമിലെത്തിക്കാം.