തിരുവനന്തപുരം: സംസ്ഥാന സ്‌കൂള്‍ മീറ്റുകളിലെ വിജയികള്‍ക്ക് നല്‍കി വരുന്ന സമ്മാന തുകയില്‍ വര്‍ധനവ് നിര്‍ദേശിച്ച് നിയമസഭാ സമിതി. സ്വര്‍ണം -2000, വെള്ളി 1500, വെങ്കലം- 1200 രൂപയായി വര്‍ധിപ്പിക്കാനാണ് നിര്‍ദേശം. നിലവില്‍ 1500, 1300, 1000 രൂപയാണ് നല്‍കുന്നത്.
സംസ്ഥാന മീറ്റുകളില്‍ റെക്കോര്‍ഡ് നേടുന്നവര്‍ക്ക് 2000 എന്നത് 4000 രൂപയായും ദേശീയ മീറ്റില്‍ റെക്കോര്‍ഡ് സ്ഥാപിക്കുന്നവര്‍ക്ക് നിലവില്‍ 10,000 രൂപ നല്‍കുന്നത് 20,000 രൂപയായും വര്‍ധിപ്പിക്കാനും ശുപാര്‍ശ ചെയ്യുന്നു. മികച്ച സ്‌കൂളിന് 2.50 ലക്ഷവും രണ്ടാം സ്ഥാനക്കാര്‍ക്ക് 1.80 ലക്ഷവും മൂന്നാമത്തെ സ്‌കൂളിന് 1.40 ലക്ഷവുമായി സമ്മാന തുക വര്‍ധിപ്പിക്കണം.
വാര്‍ഷിക, അക്കാദമിക് പരീക്ഷകളും ദേശീയ സ്‌പോര്‍ട്‌സ് മീറ്റുകളും ഒരേ സമയം വരാത്ത വിധത്തില്‍ പരീക്ഷാ കലണ്ടര്‍ തയ്യാറാക്കണം. ദേശീയ ജൂനിയര്‍ മീറ്റും സംസ്ഥാന സ്‌കൂള്‍ മീറ്റുകളും ഒരേ സമയം വരുന്നതിനാല്‍ താരങ്ങള്‍ക്ക് പങ്കെടുക്കാന്‍ കഴിയാതെ വരുന്നുണ്ട്. മീറ്റുകള്‍ ഒരേ സമയത്ത് വരാത്ത രീതിയില്‍ പുനഃക്രമീകരിക്കണമെന്നും സമിതി നിര്‍ദേശിച്ചു.