പൊന്നാനി: അവര്‍ വരുന്നൂ, നാലായിരത്തിലധികം കിലോമീറ്ററുകള്‍ ഇടതടവില്ലാതെ പറന്ന് ദൈവത്തിന്റെ സ്വന്തം നാട് തേടി. ഇനി ഒന്‍പത് മാസക്കാലം റഷ്യ, മംഗോളിയ, ജപ്പാന്‍, ചൈന എന്നിവിടങ്ങളില്‍ പാര്‍ക്കുന്ന ദേശാടനക്കിളി വര്‍ഗമായ തവിടന്‍ഷ്രൈക്ക് പക്ഷികളാണ് ആകാശത്തിലൂടെ കിലോമീറ്ററുകള്‍ പിന്നിട്ട് കേരളത്തിലെത്തുന്നത്. ഓഗസ്റ്റ് മാസത്തോടെ എത്തിത്തുടങ്ങിയ തവിടന്‍ പക്ഷികള്‍ക്ക് മെയ് മാസം വരെ കേരളമാണ് തറവാട് .
കേരളത്തില്‍ കൂടുതല്‍ കാലം താമസിക്കുന്ന ദേശാടനക്കിളികളാണ് ഇക്കൂട്ടര്‍. മൂന്നുമാസം എന്ന ചുരുങ്ങിയ സമയം കൊണ്ടാണ് നാലായിരത്തോളം കിലോമീറ്ററുകള്‍ പറന്ന് ഇവ എത്തുക. കൂടുകെട്ടി കുഞ്ഞുവിരിയിച്ചാണ് ഇവ തിരിച്ചുപോകുന്നതെന്ന് പക്ഷി നിരീക്ഷകനായ കുന്ദംകുളം ബഥനി ഹയര്‍സെക്കന്‍ഡറി സ്‌കൂളിലെ പ്രിന്‍സിപ്പല്‍ ഫാദര്‍ പത്രോസ് പറഞ്ഞു.
തണുപ്പുകാലമായാലും ചൂടുകാലമായാലും ഇവര്‍ക്ക് പ്രതിസന്ധികളില്ല. പ്രതികൂല കാലാവസ്ഥകളിലും ഇവ സുഖകരമായി പാര്‍ക്കും. അത് ഈ പക്ഷികളുടെ മാത്രം പ്രത്യേകതയാണ്. ഒറ്റയ്ക്ക് പാര്‍ക്കുന്ന തവിടന്‍ പക്ഷികള്‍ കൂറ്റന്‍ മരങ്ങളില്‍ പാര്‍ക്കാറില്ലെന്ന് ഫാദര്‍ പത്രോസ് പറയുന്നു.
ആകൃതിയിലും കാഴ്ചയിലും ഒരു പോലെ തോന്നിക്കുന്ന മൂന്ന് തവിടന്‍ പക്ഷികളെ കേരളത്തില്‍ കണ്ടുവരുന്നുണ്ടെന്നും ഫാദര്‍ പത്രോസ് പറഞ്ഞു. അസുരക്കിളി, ചാരക്കുട്ടന്‍ എന്നീ ഇനങ്ങളില്‍പെട്ട പക്ഷികളാണിവ. ഇതില്‍ തവിടന്‍ മാത്രമാണ് ദേശാടന സ്വഭാവത്തിലുള്ളത്. മറ്റു രണ്ടു പക്ഷി വര്‍ഗങ്ങളും കേരളത്തില്‍ സ്ഥിരവാസികളാണ്.
ചാരക്കുട്ടന്‍ പക്ഷികളെക്കാള്‍ ചെറുതാണ് തവിടന്‍ പക്ഷികള്‍. ഒറ്റയ്ക്ക് ഇരതേടുക ഇവയുടെ സ്വഭാവമാണ്. മിക്കപ്പോഴും ചെറുപ്രാണികള്‍, ഗൗളികള്‍, വണ്ടുകള്‍ എന്നിവയാണ് തവിടന്റെ ആഹാരം. തുറസായ പ്രദേശങ്ങളും കാടരികിലുള്ള പൊന്തക്കാടുകളുമാണ് തവിടന്‍ പക്ഷികളുടെ ഇഷ്ടസങ്കേതം.
കേരളത്തില്‍ കോഴിക്കോട് ജില്ലയിലെ കടലുണ്ടി, ചെലവൂര്‍, സരോവരം ബയോപാര്‍ക്ക് എന്നിവിടങ്ങളിലും ഇടുക്കിയിലെ മൂന്നാറിലുമാണ് തവിടനെ കൂടുതലായി കാണാറുള്ളതെന്ന് പക്ഷി നിരീക്ഷകര്‍ പറയുന്നു. കേരളത്തിന് പുറത്ത് തമിഴ്‌നാട്ടിലും ഈ പക്ഷിയെ കണ്ടുവരുന്നുണ്ട്.