മുക്കം: കേന്ദ്ര സര്‍ക്കാര്‍ രാജ്യവ്യാപകമായി നടപ്പാക്കിയ ചരക്കു സേവന നികുതി ചെറുകിട വ്യാപാര മേഖലയെ കടുത്ത പ്രതിസന്ധിയിലാക്കുന്നതായി വ്യാപാരികള്‍.
നേരത്തെ ഉണ്ടായിരുന്നതിന്റെ പകുതിയിലധികം വ്യാപാരം ജി.എസ്.ടി വന്നതോടെ കുറഞ്ഞെന്ന് വ്യാപാരികള്‍ പറയുന്നു. ചെറുകിട വ്യാപാര സ്ഥാപനങ്ങളില്‍ ഭൂരിഭാഗവും അടച്ചുപൂട്ടലിന്റെ വക്കിലാണെന്നും അവര്‍ വിശദീകരിക്കുന്നു. ഹോട്ടലുകള്‍, സ്റ്റേഷനറി കടകള്‍, മൊബൈല്‍ ഷോപ്പുകള്‍, ഫാന്‍സി കടകള്‍ തുടങ്ങിയിടങ്ങളിലെല്ലാം പ്രതിസന്ധി രൂക്ഷമാണ്. ഇപ്പോള്‍ നടക്കുന്ന തുച്ഛമായ വ്യാപാരത്തില്‍ നിന്നുള്ള വരുമാനം വാടക നല്‍കാന്‍ പോലും തികയുന്നില്ലെന്നും അവര്‍ പരാതിപ്പെടുന്നു.
ഹോട്ടല്‍ മേഖലയെയാണ് ജി.എസ്.ടി ഗുരുതരമായ പ്രതിസന്ധിയിലെത്തിച്ചിരിക്കുന്നതെന്ന് അവര്‍ ചൂണ്ടിക്കാട്ടുന്നു. 12 ശതമാനമാണ് ഹോട്ടലുകള്‍ക്ക് ജി.എസ്.ടി ചുമത്തിയിരിക്കുന്നത്. അത് എ.സിയാണെങ്കില്‍ 18 ശതമാനവുമാകും. ആയിരം രൂപയ്ക്ക് ഭക്ഷണം കഴിക്കുന്നവര്‍ 120 രൂപ കൂടി അധികം നല്‍കണം. ഇത് ഉപഭോക്താക്കളില്‍ നിന്നാണ് ഹോട്ടലുകള്‍ ഈടാക്കുന്നത്. ഇതോടെ ജനങ്ങള്‍ ജി.എസ്.ടി ഈടാക്കാത്ത ചെറുകിട ഹോട്ടലുകളേയും തട്ടുകടകളേയും ആശ്രയിക്കാന്‍ തുടങ്ങി.
ദിവസം ഒരു ലക്ഷം രൂപയുടെ വരെ കച്ചവടം നടന്നിരുന്ന ഹോട്ടലുകളില്‍ ജി.എസ്.ടിക്ക് ശേഷം 30,000 രൂപയുടെ കച്ചവടം പോലും നടക്കാത്ത അവസ്ഥയാണിന്നുള്ളത്. ഇത് ഹോട്ടലുകളില്‍ ജോലി ചെയ്യുന്ന തൊഴിലാളികളേയും ആശങ്കയിലാഴ്ത്തിയിട്ടുണ്ട്. വ്യാപാരം ഗണ്യമായി കുറഞ്ഞതോടെ പല ഹോട്ടലുകളില്‍ നിന്നും ജീവനക്കാരെ പിരിച്ചുവിടുന്ന സാഹചര്യവുമുണ്ട്. മാസങ്ങള്‍ക്ക് മുമ്പ് ഒറ്റയടിക്ക് നടപ്പിലാക്കിയ നോട്ടു നിരോധനം മൂലം വലിയ പ്രതിസന്ധി നേരിട്ട കച്ചവടക്കാര്‍ അതില്‍ നിന്ന് മുക്തരായി വരുന്നതിനിടെയാണ് ജി.എസ്.ടി പ്രഖ്യാപനം വന്നത്.
വരാനിരിക്കുന്ന ഓണം- പെരുന്നാള്‍ സീസണിലാണ് ഇപ്പോള്‍ വ്യാപാരികളുടെ പ്രതീക്ഷ. ജി.എസ്.ടി വന്നാല്‍ സാധനങ്ങള്‍ക്ക് വില കുറയുമെന്നാണ് കരുതിയിരുന്നതെങ്കിലും അതുണ്ടായില്ല. മൊത്തക്കച്ചവടക്കാരില്‍ നിന്ന് സാധനങ്ങള്‍ ലഭിക്കാതിരിക്കുന്നതും പ്രതിസന്ധി രൂക്ഷമാക്കിയതായി വ്യാപാരികള്‍ പറയുന്നു. പ്രമുഖ കമ്പനികളുടെ ഉല്‍പന്നങ്ങള്‍ക്കാണ് ഫാന്‍സി, സ്റ്റേഷനറി കടകളില്‍ ക്ഷാമമുള്ളത്. ബിസ്‌കറ്റ്, ടൂത്ത് പേസ്റ്റ്, സാനിറ്ററി പാഡ്, സോപ്പ്, സോപ്പുപൊടി തുടങ്ങിയവയെല്ലാം വിപണിയില്‍ സുലഭമല്ല. സാനിറ്ററി പാഡുകള്‍ക്ക് 18 ശതമാനം നികുതി ഏര്‍പ്പെടുത്തിയതോടെ മെഡിക്കല്‍ ഷോപ്പുകളില്‍ നിന്ന് ഒരു മാസം മുന്‍പ് തന്നെ ഇത് ലഭിക്കാതായി.
മൊബൈല്‍ ഷോപ്പുകളില്‍ ജി.എസ്.ടിക്ക് ശേഷം വലിയ പ്രതിസന്ധിയാണുള്ളത്. പല കമ്പനികളുടെ വിതരണക്കാരും വിപണിയില്‍ നിന്ന് പിന്‍വലിഞ്ഞു കഴിഞ്ഞു.
വില്‍പനയിലും ഗണ്യമായ കുറവുണ്ടായി. കടകളിലെ മുഴുവന്‍ സ്റ്റോക്കും തീര്‍ന്നതിനുശേഷം മാത്രമേ സാധനങ്ങള്‍ നല്‍കൂ എന്ന പ്രമുഖ കമ്പനികളുടെ നിലപാടില്‍ ഫാന്‍സി മേഖലയും വലിയ പ്രതിസന്ധി നേരിടുകയാണെന്നും വ്യാപാരികള്‍ വ്യക്തമാക്കുന്നു.