ന്യൂഡല്‍ഹി: പണമടങ്ങിയ തന്റെ ബാഗ് തട്ടിപ്പറിച്ചെടുത്ത് രക്ഷപ്പെടുന്ന ആക്രമികളെ തടയുന്നതിനിടെ വെടിയേറ്റ് മധ്യവയസ്‌കന്‍ മരിച്ചു. ഡല്‍ഹി അശോക് വിഹാറിലാണ് സംഭവം.

42ഉകാരനായ സഞ്ജീവ് കുമാര്‍ ആണ് കൊല്ലപ്പെട്ടത്. കഴിഞ്ഞ ദിവസം രാത്രി 8.30ഓടെ സഞ്ജീവ് കുമാര്‍ തന്റെ സ്‌കൂട്ടര്‍ വീടിനു പുറത്ത് പാര്‍ക്ക് ചെയ്ത് വരുന്നതിനിടെയാണ് രണ്ടു ബൈക്കില്‍ ആക്രമികള്‍ എത്തിയത്. അദ്ദേഹത്തിന്റെ രണ്ടു ഭാഗത്തും വളഞ്ഞ ആക്രമികള്‍ ബാഗ് തട്ടിപ്പറിച്ചെടുത്തു. ഇതു തടഞ്ഞ സഞ്ജീവിനെ വെടിവയ്ക്കുകയായിരുന്നു. ബാഗില്‍ 40,000 രൂപയുണ്ടായിരുന്നു.

ശബ്ദം കേട്ട് സ്ഥലത്തെത്തിയ സമീപവാസികള്‍ രക്തത്തില്‍ കുളിച്ചുകിടക്കുന്ന സഞ്ജീവിനെയാണ് കണ്ടത്. ഉടന്‍ തന്നെ അദ്ദേഹത്തെ ആശുപത്രിയിലെത്തിച്ചെങ്കിലും മരിച്ചിരുന്നു.

സ്ഥലത്തുനിന്നും ലഭിച്ച സി.സി.ടി.വി ദൃശ്യങ്ങള്‍ പരിശോധിച്ചുവെന്നും എന്നാല്‍ ആക്രമികള്‍ ഹെല്‍മറ്റ് ധരിച്ചിരുന്നുവെന്നും പൊലിസ് പറഞ്ഞു. ഇദ്ദേഹത്തെ വ്യക്തിപരമായി അറിയുന്നവരാകാം കൊലക്ക് പിന്നിലെന്നാണ് പൊലിസ് നിഗമനം.