തിരുവല്ല: സ്‌കൂള്‍-കോളജ് വിദ്യാര്‍ഥികള്‍ക്ക് കഞ്ചാവ് എത്തിച്ചു നല്‍കുന്ന പ്രധാന ഇടനിലക്കാരന്‍ എക്‌സൈസിന്റെ പടിയില്‍. കുറ്റപ്പുഴ സിറ്റിസണ്‍ കോളനിയില്‍ രാധികാ ഭവനത്തില്‍ രതീഷിനെ(31) ആണ് ഇന്നലെ എക്‌സൈസ് സംഘം അറസ്റ്റ് ചെയ്തത്. എക്‌സൈസിന് ലഭിച്ച രഹസ്യ വിവരത്തെ തുടര്‍ന്ന് ചെവ്വാഴ്ച വൈകിട്ട് ഏഴോടെ സിറ്റിസണ്‍ പാലത്തിന് സമീപത്ത് നിന്നുമാണ് ഇയാളെ അറസ്റ്റ് ചെയ്തത്. രതീഷിന്റെ സഹോദരനും പ്രധാന ഇടപാടുകാരനുമായ വടിവാള്‍ രാജേഷ് എന്നറിയപ്പെടുന്ന ചുമത്ര ആറ്റുചിറയില്‍ രാജേഷ്(38) എക്‌സൈസ് സംഘത്തെ വെട്ടിച്ച് കടന്നുകളഞ്ഞു. ഇയാളെ രണ്ടാം പ്രതിയാക്കി കേസ് രജിസ്റ്റര്‍ ചെയ്തു. രണ്ട് ഗ്രാമിന്റെ ഒരു പൊതി കഞ്ചാവ് അഞ്ഞൂറ് രൂപയ്ക്കാണ് വിദ്യാര്‍ഥികള്‍ക്ക് ഇയാള്‍ വിറ്റിരുന്നത്.