കാന്‍ഡി: ശ്രീലങ്കയ്‌ക്കെതിരായ രണ്ടാം ഏകദിനത്തില്‍ ഇന്ത്യക്ക് വിജയം. തോല്‍വി മുന്നില്‍ കണ്ട ഇന്ത്യയെ മുന്‍ നായകന്‍ ധോണിയും അവസരത്തിനൊത്തുയര്‍ന്ന ഭുവനേശ്വര്‍ കുമാറും ചേര്‍ന്ന് മൂന്ന് വിക്കറ്റിന്റെ നാടകീയ വിജയത്തിലേക്ക് നയിക്കുകയായിരുന്നു. മഴ രസംകൊല്ലിയായ പോരാട്ടത്തില്‍ ആദ്യം ബാറ്റ് ചെയ്ത ലങ്ക 50 ഓവറില്‍ എട്ട് വിക്കറ്റ് നഷ്ടത്തില്‍ 236 റണ്‍സെടുത്തു. മഴമൂലം 47 ഓവറാക്കി ചുരുക്കിയ മത്സരത്തില്‍ ഇന്ത്യയുടെ വിജയ ലക്ഷ്യം 231 ആക്കി മാറ്റി. ലക്ഷ്യം പിന്തുടര്‍ന്ന ഇന്ത്യ ഏഴ് വിക്കറ്റ് നഷ്ടത്തില്‍ 231 റണ്‍സെടുത്ത് വിജയിക്കുകയായിരുന്നു. ഒരു ഘട്ടത്തില്‍ ഏഴ് വിക്കറ്റ് നഷ്ടത്തില്‍ 131 റണ്‍സെന്ന നിലയില്‍ തകര്‍ന്നുപോയ ഇന്ത്യയെ ഭുവനേശ്വര്‍ കുമാര്‍ (പുറത്താകാതെ 54), മഹേന്ദ്രസിങ് ധോണി (പുറത്താകാതെ 45) എന്നിവരുടെ അവസരോചിത ബാറ്റിങാണ് വിജയത്തിലേക്ക് കൈപിടിച്ചുയര്‍ത്തിയത്. ഏകദിനത്തിലെ കന്നി അര്‍ധ സെഞ്ച്വറിയാണ് ഭുവനേശ്വര്‍ കുറിച്ചത്. അഞ്ച് മത്സരങ്ങളടങ്ങിയ പരമ്പരയില്‍ ഇന്ത്യ 2-0ത്തിന് മുന്നില്‍.
വിജയ ലക്ഷ്യം പിന്തുടര്‍ന്ന ഇന്ത്യക്ക് മികച്ച തുടക്കമാണ് ലഭിച്ചത്. രോഹിത് ശര്‍മ(54) ശിഖര്‍ ധവാന്‍(49) സഖ്യം 109 റണ്‍സ് ഓപണിങില്‍ കൂട്ടിച്ചേര്‍ത്തു. 45 പന്തില്‍ അഞ്ച് ബൗണ്ടറിയും മൂന്ന് സിക്‌സറുമടങ്ങുന്നതായിരുന്നു രോഹിതിന്റെ ഇന്നിങ്‌സ്. ഇരുവരും പുറത്തായതിനെ പിന്നാലെ ഇന്ത്യ അവിശ്വസനീയമായി തകരുകയായിരുന്നു. സ്പിന്നര്‍ അഖില ധനഞ്ജയ ഈ കൂട്ടുകെട്ട് പൊളിച്ചതോടെ ഇന്ത്യയുടെ തകര്‍ച്ചയും തുടങ്ങി. ലോകേഷ് രാഹുല്‍ (നാല്), കേദാര്‍ ജാദവ് (ഒന്ന്), വിരാട് കോഹ്‌ലി (നാല്), ഹര്‍ദിക് പാണ്ഡ്യ (0), അക്‌സര്‍ പട്ടേല്‍ (ആറ്) എന്നിവര്‍ അതിവേഗം കൂടാരം കയറി. ആറ് വിക്കറ്റെടുത്ത ധനഞ്ജയയുടെ മാരക ബൗളിങ്ങാണ് ഇന്ത്യയെ തകര്‍ത്തത്. ലങ്കയെ ദുര്‍ബലരായി കണ്ടത് ഇന്ത്യക്ക് തിരിച്ചടിയായി മാറുകയായിരുന്നു.
നേരത്തെ ടോസ് നേടി ഇന്ത്യ ബൗളിങ് തിരഞ്ഞെടുക്കുകയായിരുന്നു. ലങ്ക ആദ്യ ഘട്ടത്തില്‍ തകര്‍ന്ന ശേഷമാണ് ഭേദപ്പെട്ട സ്‌കോര്‍ സ്വന്തമാക്കിയത്. സിരിവര്‍ധന (58), ചമര കപുഗദേര (40) എന്നിവരാണ് അവര്‍ക്കായി തിളങ്ങിയത്. നിരോഷന്‍ ഡിക്ക്‌വെല (31), ഗുണതിലക (19), കുശാല്‍ മെന്‍ഡിസ് (19), ഉപുല്‍ തരംഗ (ഒന്‍പത്) എയ്ഞ്ചലോ മാത്യൂസ് (20) എന്നിവര്‍ക്കൊന്നും മികച്ച തുടക്കം മുതലാക്കാനായില്ല. സിരിവര്‍ധനയെുടെ ഇന്നിങ്‌സില്‍ രണ്ട് ബൗണ്ടറിയും ഒരു സിക്‌സറുമുണ്ടായിരുന്നു. കപുഗദേര രണ്ട് ബൗണ്ടറിയടിച്ചു. നാല് വിക്കറ്റെടുത്ത ജസ്പ്രീത് ബുമ്‌റയാണ് ലങ്കയെ തകര്‍ത്തത്. യുസ്‌വേന്ദ്ര ചഹല്‍ രണ്ടു വിക്കറ്റെടുത്തു.