പുല്‍പ്പള്ളി: കര്‍ണാടകയിലെ മത്സ്യകുഞ്ഞുല്‍പാദന കേന്ദ്രങ്ങളില്‍നിന്നും വന്‍തോതില്‍ മത്സ്യകുഞ്ഞുങ്ങള്‍ കേരളത്തിലേക്ക് വരാന്‍ തുടങ്ങി.
വയനാട്, കണ്ണൂര്‍, കാസര്‍ഗോഡ്, മലപ്പുറം ജില്ലകളിലേക്കാണ് പ്രധാനമായും കര്‍ണാടകയില്‍ നിന്നുള്ള മത്സ്യകുഞ്ഞുങ്ങള്‍ എത്തുന്നത്. കേരളത്തില്‍ മത്സ്യകൃഷി പ്രോത്സാഹനത്തിനായി കോടിക്കണക്കിന് രൂപമുടക്കി വന്‍പദ്ധതികള്‍ നടപ്പാക്കുന്നുണ്ടെങ്കിലും കര്‍ഷകര്‍ക്ക് ഉപകാരപ്രദമായ രീതിയില്‍ ബന്ധപ്പെട്ട ഉദ്യോഗസ്ഥര്‍ ഇവ നടപ്പാക്കാത്തതാണ് കര്‍ഷകര്‍ അയല്‍സംസ്ഥാനങ്ങളെ ആശ്രയിക്കാന്‍ ഇടയാവുന്നത്. കേരളത്തോട് ചേര്‍ന്ന കര്‍ണാടകയിലെ അണക്കെട്ടുകളോട് അനുബന്ധിച്ചാണ് ഫിഷ് ഹാച്ചറികളുള്ളത്. കേരളത്തില്‍ കാലവര്‍ഷം ആരംഭിക്കുന്നത് കണക്കാക്കിയാണ് കര്‍ണാടകയിലെ മത്സ്യകുഞ്ഞുങ്ങളുടെ പ്രജനന നടപടികള്‍. മെയ് മാസം പകുതിയോടെയാണ് അമ്മ മീനുകള്‍ക്ക് ഹോര്‍മോണ്‍ കുത്തിവെക്കുന്നത്. ജൂണ്‍ അവസാനത്തോടെ മത്സ്യകുഞ്ഞുങ്ങള്‍ വിതരണത്തിന് തയാറാകും. ഒക്‌ടോബര്‍ അവസാനംവരെ കര്‍ണാടകയുടെ ഹാച്ചറികളില്‍ മത്സ്യകുഞ്ഞുങ്ങള്‍ ലഭിക്കും. തിലോപ്പിയ, കട്‌ല, ചെമ്പല്ലി, മാഫിയര്‍, സില്‍വര്‍ കാര്‍ഫ്, ഗ്രാസ് കാര്‍പ്, മൃഗാള്‍, റുഗു എന്നിവയാണ് കര്‍ണാടകയിലെ ഹാച്ചറികളില്‍ പ്രധാനമായും ഉല്‍പാദിപ്പിക്കുന്നത്. കേരളത്തില്‍നിന്നും ആവശ്യക്കാരേറിയതോടെ അടുത്തകാലത്തായി കൊഞ്ചിന്റെ കുഞ്ഞുങ്ങളുടെ ഉല്‍പ്പാദനവും കര്‍ണാടകയില്‍ ആരംഭിച്ചിട്ടുണ്ട്. കര്‍ണാടകയിലെ ബീച്ചനഹള്ളിയിലെ കബനി അണക്കെട്ട്, താര്‍ക്ക, നുഗു എന്നീ അണക്കെട്ടുകളോട് അനുബന്ധിച്ചാണ് മത്സ്യകുഞ്ഞുങ്ങളുടെ ഉല്‍പാദനത്തിനുള്ള ഹാച്ചറികള്‍ നിര്‍മ്മിച്ചിട്ടുള്ളത്. കര്‍ണാടക ഫിഷറീസ് വകുപ്പിന്റെ മേല്‍നോട്ടത്തിലാണ് ഇവ പ്രവര്‍ത്തിക്കുന്നത്. ഓക്‌സിജന്‍ നിറച്ച പ്ലാസ്റ്റിക് ബാഗുകളില്‍ ലഭിക്കുന്ന മത്സ്യകുഞ്ഞുങ്ങളെ എട്ടു മണിക്കൂറിനുള്ളില്‍ കുളത്തിലൊ തടാകത്തിലൊ വിട്ടാല്‍മതി. ഈ സൗകര്യമുള്ളതുകൊണ്ട് കര്‍ണാടകയില്‍നിന്നും ഏറെ ദൂരെവരെ ഇവിടെനിന്നും മത്സ്യകുഞ്ഞുങ്ങളെ കൊണ്ടുപോകുവാന്‍ സാധിക്കുന്നു.