കൊടുങ്ങല്ലൂര്‍: താലൂക്കിന്റെ തീരദേശത്ത് നിന്നും ഒരു കിലോ ഇരുനൂറ് ഗ്രാം കഞ്ചാവുമായി കോതമംഗലം കോട്ടപ്പടി കാട്ടക്കുശ്ശേരി ബഷീര്‍ (49) എന്നയാളെ കൊടുങ്ങല്ലൂര്‍ എക്‌സൈസ് അറസ്റ്റുചെയ്തു. ഓണത്തോടനുബന്ധിച്ചുള്ള പ്രത്യേക പരിശോധനയിലാണ് ഇയാള്‍ എക്‌സൈസിന്റെ പിടിയിലായത്. കഴിഞ്ഞ ദിവസം 150 ഗ്രാം കഞ്ചാവുമായി കയ്പമംഗലം മാപ്പിളക്കുളത്ത് അഷറഫ് എന്നയാളെ എക്‌സൈസ് ഷാഡോ സംഘം പിടികൂടിയിരുന്നു. ഇയാളില്‍ നിന്നും ലഭിച്ച വിവരങ്ങളുടെ അടിസ്ഥാനത്തിലാണ് പെരുമ്പാവൂരില്‍ നിന്നും കഞ്ചാവുമായി എത്തി തീരദേശമേഖലയില്‍ വില്പ്പന നടത്തിവന്നിരുന്ന ബഷീര്‍ എക്‌സൈസ് സംഘത്തിന്റെ വലയിലായത്. കഞ്ചാവിന്റെ ആവശ്യക്കാരെന്ന വ്യാജേന ഇയാളെ ഫോണില്‍ വിളിച്ച് കൂളിമുട്ടം പൊക്ലായിയിലേക്ക് വിളിച്ചുവരുത്തി പിടികൂടുകയായിരുന്നു. തീരദേശം കേന്ദ്രീകരിച്ച് കഞ്ചാവ് വില്‍പ്പന നടത്തിവരുന്ന ചെറുകിട സംഘങ്ങള്‍ക്ക് മൊത്തമായി കഞ്ചാവ് എത്തിക്കുന്ന സംഘത്തിലെ പ്രധാന കണ്ണിയാണ് ഇയാളെന്ന് എക്‌സൈസ് ഉദ്യോഗസ്ഥര്‍ പറഞ്ഞു.