തിരുവനന്തപുരം : സംസ്ഥാനത്തെ സ്‌കൂളുകളില്‍ നിന്നുള്ള ഇ മാലിന്യം നിര്‍മാര്‍ജനം ചെയ്യുന്ന ദ്ധതിയുടെ ഉദ്ഘാടനം വിദ്യാഭ്യാസ വകുപ്പുമന്ത്രി സി. രവീന്ദ്രനാഥ് നിര്‍വഹിച്ചു. വിദ്യാഭ്യാസ വകുപ്പിനു കീഴിലുള്ള കേരള ഇന്‍ഫ്രാസ്ട്രക്ചര്‍ ആന്റ് ടെക്‌നോളജി ഫോര്‍ എഡ്യൂക്കേഷനും (കൈറ്റ് ഐ.ടി @ സ്‌കൂള്‍) തദ്ദേശഭരണ വകുപ്പിനു കീഴിലുള്ള ക്ലീന്‍ കേരള കമ്പനിയും സംയുക്തമായാണ് ഹരിതകേരളം മിഷന്റെ സഹകരണത്തോടെ പദ്ധതി ആരംഭിച്ചത്.
ഇ മാലിന്യം ശേഖരിച്ച ആദ്യ വാഹനത്തിന്റെ ഫ്‌ളാഗ് ഓഫ് കോട്ടണ്‍ഹില്‍ ഗവ. ഗേള്‍സ് ഹയര്‍സെക്കന്‍ഡറി സ്‌കൂളില്‍ വിദ്യാഭ്യാസമന്ത്രി നിര്‍വഹിച്ചു. 2730 കിലോ ഇമാലിന്യമാണ് കോട്ടണ്‍ഹില്‍ സ്‌കൂളില്‍ നിന്ന് മാത്രം ശേഖരിച്ചത്. ഇതേ സമയത്ത് തന്നെ ഹൈടെക് സ്‌കൂള്‍ പൈലറ്റ് പ്രവര്‍ത്തനങ്ങള്‍ നടത്തുന്ന ആലപ്പുഴ, പുതുക്കാട്, കോഴിക്കോട് നോര്‍ത്ത് , തളിപ്പറമ്പ് മണ്ഡലങ്ങളിലും ഇമാലിന്യം ശേഖരിച്ച വാഹനങ്ങളുടെ ഫ്‌ളാഗ് ഓഫ് ചടങ്ങ് നടന്നു.
അഞ്ചു കേന്ദ്രങ്ങളേയും പ്രത്യേകം വീഡിയോ കോണ്‍ഫറന്‍സിംഗിലൂടെ ബന്ധിപ്പിച്ചാണ് തിരുവനന്തപുരത്ത് സംസ്ഥാനതല ഉദ്ഘാടനം നടത്തിയത്.
ഹരിതകേരളം മിഷന്‍ ഉപാധ്യക്ഷ ഡോ. ടി.എന്‍ സീമ, പൊതുവിദ്യാഭ്യാസ വകുപ്പ് സെക്രട്ടറി ഡോ. ഉഷാ ടൈറ്റസ്, കൈറ്റ് വൈസ് ചെയര്‍മാന്‍ കെ. അന്‍വര്‍ സാദത്ത്, ക്ലീന്‍ കേരള മാനേജിങ് ഡയറക്ടര്‍ കബീര്‍ ബി. ഹാറൂണ്‍, ശുചിത്വമിഷന്‍ ഡയറക്ടര്‍ സി.വി ജോയ് തുടങ്ങിയവര്‍ സംബന്ധിച്ചു.