തിരുവനന്തപുരം: പൊലിസ് ഫോട്ടോഗ്രാഫര്‍മാര്‍ എടുക്കുന്ന മികച്ച ഫോട്ടോകള്‍ക്ക് അവാര്‍ഡ് ഏര്‍പ്പെടുത്തുമെന്ന് സംസ്ഥാന പൊലിസ് മേധാവി ലോക്‌നാഥ് ബെഹറ. കുറ്റാന്വേഷണമുള്‍പ്പെടെ വിവിധ ചുമതലകളുമായി ബന്ധപ്പെട്ട് ഓരോ വര്‍ഷവും എടുക്കുന്ന ചിത്രങ്ങളില്‍ നിന്ന് മികച്ച ചിത്രങ്ങള്‍ക്കാണ് അവാര്‍ഡ് നല്‍കുക. കേരള പൊലിസ് പുതുതായി ആരംഭിക്കുന്ന ഫോട്ടോ ആര്‍ക്കൈവ് സംവിധാനത്തെക്കുറിച്ച് ഫോട്ടോഗ്രാഫര്‍മാര്‍ക്കുള്ള പരിശീലന പരിപാടി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
കുറ്റാന്വേഷണത്തിന് മികച്ച പിന്തുണ നല്‍കുന്ന ഫോട്ടോഗ്രാഫര്‍മാര്‍ക്ക് 'ബാഡ്ജ് ഓഫ് ഓണറി'ന് തുല്യമായ പുരസ്‌കാരങ്ങളും ഏര്‍പ്പെടുത്തും. ഫോട്ടോഗ്രാഫിയിലെ പുതുപ്രവണതകളെ പരിചയപ്പെടുത്തുന്ന പരിശീലന പരിപാടി ഫോട്ടോഗ്രാഫര്‍മാര്‍ക്കായി നടപ്പാക്കുമെന്നും അദ്ദേഹം പറഞ്ഞു.
ഹെഡ്ക്വാര്‍ട്ടേഴ്‌സ് എ.ഡി.ജി.പി എസ്. ആനന്ദകൃഷ്ണന്‍, ഹെഡ്ക്വാര്‍ട്ടേഴ്‌സ് ഐ.ജി. ദിനേന്ദ്ര കശ്യപ്, പൊലിസ് ട്രെയിനിങ് കോളജ് പ്രിന്‍സിപ്പല്‍ കെ. സേതുരാമന്‍, പൊലിസ് ഇന്‍ഫര്‍മേഷന്‍ സെന്റര്‍ ഡെപ്യൂട്ടി ഡയറക്ടര്‍ പി.എസ്. രാജശേഖരന്‍, ചീഫ് ഫോട്ടോഗ്രാഫര്‍ ഇന്‍ ചാര്‍ജ്ജ് പി.എം. സുരേഷ് ബാബു എന്നിവര്‍ സംസാരിച്ചു. കെല്‍ട്രോണ്‍ അസ്സിസ്റ്റന്റ് മാനേജര്‍ ബിന്‍സന്‍, കെല്‍ട്രോണ്‍ സീനിയര്‍ എന്‍ജിനീയര്‍ തെരേസ, പൊലിസ് ഇന്‍ഫര്‍മേഷന്‍ സെന്റര്‍ ഫോട്ടോഗ്രാഫര്‍ എം. ഗോപു തുടങ്ങിയവര്‍ പരിശീലന സെഷനുകള്‍ക്ക് നേതൃത്വം നല്‍കി.