കോഴിക്കോട്: ഓര്‍ഫനേജ് കണ്‍ട്രോള്‍ ബോര്‍ഡില്‍ രജിസ്റ്റര്‍ ചെയ്തിട്ടുള്ള അനാഥാലയങ്ങള്‍ ജെ.ജെ ആക്ടിന് കീഴിലും രജിസ്റ്റര്‍ ചെയ്യണമെന്ന നിബന്ധന സ്ഥാപനങ്ങള്‍ അടച്ചുപൂട്ടുന്നതിന് കാരണമാകുമെന്നതിനാല്‍ വിദ്യാഭ്യാസ വകുപ്പുമായി ചേര്‍ന്ന് ആവശ്യമായ നടപടികള്‍ സ്വീകരിക്കുമെന്ന് സാമൂഹികനീതി മന്ത്രി കെ.കെ ശൈലജ അറിയിച്ചു.
കഴിഞ്ഞ 17ന് പി.ടി.എ റഹീം എം.എല്‍.എ ഉന്നയിച്ച സബ്മിഷന് നല്‍കിയ മറുപടിയിലാണ് മന്ത്രി ഇക്കാര്യം അറിയിച്ചത്.
ഓര്‍ഫനേജ് കണ്‍ട്രോള്‍ ബോര്‍ഡിന് കീഴിലുള്ള സ്ഥാപനങ്ങളിലെ കുട്ടികള്‍ ജെ.ജെ ആക്ടിന്റെ പരിധിയില്‍ വരില്ലെന്നാണ് പി.ടി.എ റഹീം സബ്മിഷനിലൂടെ ഉന്നയിച്ചത്. ഈ കുട്ടികള്‍ സ്‌കൂള്‍ ഒഴിവുദിവസങ്ങളില്‍ സ്വന്തം വീടുകളില്‍ പോവുന്നവരും രക്ഷിതാക്കളുള്ളവരുമാണെന്നും സബ്മിഷനില്‍ വ്യക്തമാക്കുന്നു.