രാജ്യത്തെ 20 പൊതുമേഖലാ ബാങ്കുകളിലെ പ്രൊബേഷണറി ഓഫിസര്‍മാനേജ്‌മെന്റ് ട്രെയിനി തസ്തികകളിലേക്കുള്ള ഏഴാമതു പൊതുപരീക്ഷയ്ക്ക് അപേക്ഷിക്കാം. വിവിധ ബാങ്കുകളിലായി 3,247 ഒഴിവുകളാണുള്ളത്. www.ibps.in എന്ന വെബ്‌സൈറ്റിലൂടെ ഓണ്‍ലൈനായാണ് അപേക്ഷിക്കേണ്ടത്.
ഏതെങ്കിലും വിഷയത്തില്‍ ബിരുദമാണ് അപേക്ഷിക്കുന്നതിനുള്ള യോഗ്യത. 2017 ഓഗസ്റ്റ് ആറിനകം യോഗ്യത നേടിയിരിക്കണം. ഓണ്‍ലൈന്‍ രജിസ്‌ട്രേഷന്‍ നടത്തുമ്പോള്‍ ഡിഗ്രിയുടെ വിജയശതമാനംകൂടി ചേര്‍ക്കണം.
ഇന്‍സ്റ്റിറ്റ്യൂട്ട് ഓഫ് ബാങ്കിങ് പേഴ്‌സണല്‍ സെലക്ഷന്‍ (ഐ.ബി.പി.എസ്) ആണ് പരീക്ഷ നടത്തുന്നത്. രണ്ടു ഘട്ടങ്ങളിലായുള്ള എഴുത്തുപരീക്ഷ, അഭിമുഖം എന്നിവയുടെ അടിസ്ഥാനത്തിലായിരിക്കും തെരഞ്ഞെടുപ്പ്. ഒക്‌ടോബര്‍ 7, 8, 14, 15 തിയതികളിലായി പ്രിലിമിനറി പരീക്ഷ നടക്കും. തിരുവനന്തപുരം, കൊല്ലം, ആലപ്പുഴ, കോട്ടയം, കൊച്ചി, തൃശൂര്‍, പാലക്കാട്, മലപ്പുറം, കോഴിക്കോട്, കണ്ണൂര്‍ എന്നിവയാണ് കേരളത്തിലെ പരീക്ഷാ കേന്ദ്രങ്ങള്‍.
2017 ജൂലൈ ഒന്നിനു 20നും 30നും മധ്യേ പ്രായമുള്ളവരാണ് അപേക്ഷിക്കേണ്ടത്. ഉയര്‍ന്ന പ്രായത്തില്‍ എസ്.സി, എസ്.ടി വിഭാഗക്കാര്‍ക്ക് അഞ്ചും ഒ.ബി.സിക്കാര്‍ക്കു മൂന്നും ഭിന്നശേഷിക്കാര്‍ക്കു പത്തും വിമുക്തഭടന്‍മാര്‍ക്ക് അഞ്ചും വര്‍ഷത്തെ ഇളവനുവദിക്കും.
600 രൂപയാണ് അപേക്ഷാ ഫീസ്. എസ്.സി, എസ്.ടി വിഭാഗക്കാര്‍ക്കും ഭിന്നശേഷിക്കാര്‍ക്കും 100 രൂപയാണ്. മാസ്റ്റര്‍ വിസ ഡെബിറ്റ് ക്രെഡിറ്റ് കാര്‍ഡ് ഉപയോഗിച്ച് ഓണ്‍ലൈനായി ഓഗസ്റ്റ് 26വരെയാണ് ഫീസടയ്‌ക്കേണ്ടത്.
പരീക്ഷാ രീതി, അപേക്ഷിക്കേണ്ട വിധം, യോഗ്യത, പ്രായപരിധി, ഫീസ് തുടങ്ങിയവ സംബന്ധിച്ച വിശദവിവരങ്ങള്‍ വെബ്‌സൈറ്റിലെ വിജ്ഞാനപനത്തിലുണ്ട്. എസ്.സി, എസ്.ടി, ന്യൂനപക്ഷ വിഭാഗങ്ങളിലെ ഉദ്യോഗാര്‍ഥികള്‍ക്കു സൗജന്യ പരീക്ഷാ പരിശീലനത്തിന് അവസരമുണ്ട്. കേരളത്തില്‍ കൊച്ചിയും തിരുവനന്തപുരവുമാണ് പരീക്ഷാ പരിശീലന കേന്ദ്രങ്ങള്‍. പരിശീലനത്തില്‍ പങ്കെടുക്കാന്‍ താല്‍പര്യമുള്ള എസ്.സി, എസ്.ടി, മൈനോറിറ്റി അപേക്ഷകര്‍ ഓണ്‍ലൈന്‍ അപേക്ഷയില്‍ നിര്‍ദിഷ്ട കോളത്തില്‍ പരിശീലനത്തിനു തെരഞ്ഞെടുക്കുന്ന പ്രീ എക്‌സാമിനേഷന്‍ ട്രെയിനിങ് സെന്റര്‍ രേഖപ്പെടുത്തണം. ട്രെയിനിങ് സെന്ററുകളുടെ പൂര്‍ണ പട്ടിക വെബ്‌സൈറ്റില്‍ ലഭിക്കും.
അപേക്ഷിക്കാവുന്ന അവസാന തിയതി: ഓഗസ്റ്റ് 26