ചെന്നൈ: സര്‍ക്കാരിനെ വെല്ലുവിളിച്ച് പുതുച്ചേരിയിലെ റിസോര്‍ട്ടിലേക്ക് മാറിയ 19 എം.എല്‍.എമാര്‍ക്ക് തമിഴ്‌നാട് സ്പീക്കര്‍ പി.ധനപാല്‍ നോട്ടിസ് അയച്ചു. കഴിഞ്ഞദിവസം എം.എല്‍.എമാരെ അയോഗ്യരാക്കണമെന്നാവശ്യപ്പെട്ട് സര്‍ക്കാര്‍ ചീഫ് വിപ്പ് എസ്.രാജേന്ദ്രന്‍ സ്പീക്കര്‍ക്ക് കത്ത് നല്‍കിയിരുന്നു. ഇതിന്റെ അടിസ്ഥാനത്തിലാണ് അയോഗ്യരാക്കാതിരിക്കണമെങ്കില്‍ മതിയായ കാരണം ബോധിപ്പിക്കണമെന്നാവശ്യപ്പെട്ട് എം.എല്‍.എമാര്‍ക്ക് നോട്ടിസ് അയച്ചത്.
പളനിസ്വാമി-പനീര്‍ശെല്‍വം പക്ഷങ്ങള്‍ ഐക്യപ്പെട്ടതോടെയാണ് ദിനകരന്‍ അനുകൂലികള്‍ സര്‍ക്കാരിനെതിരേ കലാപമുയര്‍ത്തി പുതുച്ചേരിയിലെ റിസോര്‍ട്ടിലേക്കു മാറിയത്. സര്‍ക്കാറില്‍ വിശ്വാസമില്ലെന്ന് ചൂണ്ടിക്കാട്ടി റിസോര്‍ട്ടിലേക്ക് മാറുംമുന്‍പ് അവര്‍ ഗവര്‍ണര്‍ക്ക് കത്ത് നല്‍കിയിരുന്നു.
ഇപ്പോള്‍ ഞങ്ങളുടെ നേതാവ് ദിനകരനാണെന്നും ജയിലില്‍ കഴിയുന്ന ശശികല പുറത്തിറങ്ങുന്നതോടെ നേതൃത്വം അവര്‍ ഏറ്റെടുക്കുമെന്നും ദിനകരന്‍ അനുകൂലിയായ ഇ. രത്തിനസഭാപതി ചെന്നൈയില്‍ പറഞ്ഞു. സഭയില്‍ സര്‍ക്കാര്‍ ഭൂരിപക്ഷം തെളിയിക്കണമെന്ന ആവശ്യം പ്രതിപക്ഷം ശക്തമാക്കിയിട്ടുണ്ട്. അതേസമയം പുതുച്ചേരിയിലെത്തിയ ടി.ടി.വി.ദിനകരന്‍ റിസോര്‍ട്ടില്‍ കഴിയുന്ന 19 എം.എല്‍.എമാരുമായി ചര്‍ച്ച നടത്തി. കഴിഞ്ഞ 22 മുതല്‍ പുതുച്ചേരി വിന്‍ഡ്ഫ്‌ളവര്‍ റിസോര്‍ട്ടില്‍ കഴിഞ്ഞിരുന്ന എം.എല്‍.എമാരെ പുതുച്ചേരിയിലെതന്നെ സണ്‍വേ മാനര്‍ ഹോട്ടലിലേക്കു മാറ്റിയിട്ടുണ്ട്.
പളനിസാമി സര്‍ക്കാരിനെ സംബന്ധിച്ച് ഗവര്‍ണര്‍ വിദ്യാസാഗര്‍ റാവു ഉചിതമായ തീരുമാനം എടുക്കുന്നതുവരെ എം.എല്‍.എമാര്‍ പുതുച്ചേരിയില്‍ തുടരുമെന്ന് അണ്ണാ ഡി.എം.കെ കര്‍ണാടക അധ്യക്ഷനും ദിനകരന്‍ അനുകൂലിയുമായ വി. പുകഴേന്തി അറിയിച്ചു.