തിരുവനന്തപുരം: സമീപമുള്ള മരത്തിലൂടെ കയറി അട്ടക്കുളങ്ങര വനിതാജയിലിനകത്ത് കടന്ന യുവാവ് പൊലിസ് പിടിയിലായി. അട്ടക്കുളങ്ങര കെ.എസ്.ആര്‍.ടി സി ഗാരേജ് പരിസരത്തെ ആല്‍മരത്തിലൂടെ വനിതാ ജയിലിലേക്ക് ഊര്‍ന്നിറങ്ങിയ മുടവന്‍മുകള്‍ സ്വദേശി രാജീവാണ് (35) പിടിയിലായത്. ഇന്നലെ പുലര്‍ച്ചെ 5.45 നായിരുന്നു സംഭവം.
ഫോര്‍ട്ട് പൊലിസ് സ്റ്റേഷനും കെ.എസ്.ആര്‍.ടി.സി ഗ്യാരേജിനും സമീപത്തെ ആല്‍മരത്തില്‍ ആരും കാണാതെ കയറിയ രാജീവ് മരത്തിന്റെ ചില്ലയിലൂടെ വനിതാ ജയില്‍ കോമ്പൗണ്ടിലേക്ക് ഊര്‍ന്നിറങ്ങുകയായിരുന്നു. മരം വഴി ജയിലിനുള്ളിലേക്ക് കടക്കവേ കൈകാലുകളിലും ദേഹത്തും പരുക്കേറ്റ ഇയാളെ ഡ്യൂട്ടിയിലുണ്ടായിരുന്ന വനിതാ വാര്‍ഡന്മാര്‍ കൈയോടെ പിടികൂടി. ചോദ്യം ചെയ്യലില്‍ പരസ്പര വിരുദ്ധമായി സംസാരിച്ച ഇയാളെ ഫോര്‍ട്ട് പോലിസെത്തി കസ്റ്റഡിയിലെടുത്തു.
സ്റ്റേഷനിലെത്തിച്ച് ചോദ്യം ചെയ്‌തെങ്കിലും പരസ്പര വിരുദ്ധമായാണ് പ്രതികരിക്കുന്നത്. മാനസികനില തെറ്റിയ നിലയില്‍ ചോദ്യങ്ങള്‍ക്ക് മറുപടി നല്‍കിയ ഇയാളെപ്പറ്റി പൊലിസ് വിശദമായി അന്വേഷിച്ചുവരികയാണ്. വൈദ്യപരിശോധനക്കുശേഷം മജിസ്‌ട്രേട്ടിന് മുന്‍പാകെ ഹാജരാക്കാനാണ് പൊലിസിന്റെ തീരുമാനം.