തൃശൂര്‍: നഗരത്തിലെ സായാഹ്ന സൗഹൃദ കൂട്ടായ്മയുടെ നേതൃത്വത്തില്‍ തൃശൂര്‍ തെക്കേഗോപുര നടയില്‍ ഭീമന്‍ പൂക്കളം ഒരുക്കി. 50 അടി വ്യാസമുള്ള വമ്പന്‍ അത്തപ്പൂക്കളമാണ് തീര്‍ത്തത്. പുലര്‍ച്ചെ മൂന്നിനു വടക്കുംനാഥ ക്ഷേത്രത്തില്‍ വെടി മുഴങ്ങിയതോടെ പൂക്കളം ഇടാനാരംഭിച്ചിരുന്നു.
ഒന്നര വയസുകാരന്‍ ജീവന്‍ ജിത്തും പ്രൊഫ. എം. മുരളീധരനും ചേര്‍ന്നാണ് ആദ്യ പൂവിട്ടത്. നൂറ്റമ്പതോളം പേര്‍ ചേര്‍ന്ന് മണിക്കൂറുകള്‍ എടുത്താണ് പൂര്‍ത്തിയാക്കിയത്. ആര്‍ട്ടിസ്റ്റ് ആനന്ദന്‍ തയാറാക്കിയ സ്‌കെച്ചിനെ ആധാരമാക്കിയുള്ള പൂക്കളത്തിന് ഡാലിയ, ജമന്തി, മഞ്ഞ റോസ് തുടങ്ങിയവയാണ് ഉപയോഗിച്ചത്.
ഓറഞ്ച്, മഞ്ഞ, പച്ച നിറങ്ങളില്‍ ചേതോഹരമായ ഡിസെനിലാണ് പൂക്കളം. പി.കെ. ബിജു എം.പി പൂക്കളം ഔദ്യോഗികമായി ഉദ്ഘാടനം ചെയ്തു. മേയര്‍ അജിത ജയരാജന്‍, ജെ.പി വളപ്പില, സി.കെ ജഗനിവാസന്‍, ഷാജു വാളപ്പന്‍, എ.കെ. സോമന്‍ തുടങ്ങിയവര്‍ ഉദ്ഘാടന ചടങ്ങില്‍ പങ്കെടുത്തു.