വടകര: ഏറാമലയില്‍ വന്‍വ്യാജ വാറ്റുവേട്ട. കൈക്കണ്ടം പ്രദേശത്ത് എക്‌സൈസ് നടത്തിയ റെയ്ഡില്‍ 1200 ലിറ്റര്‍ വാഷും വാറ്റുപകരണങ്ങളും പിടികൂടി. ഓണാഘോഷത്തിന്റെ ഭാഗമായി വന്‍തോതില്‍ വ്യാജമദ്യം ഉല്‍പാദിപ്പിക്കുന്നുവെന്നു മനസിലാക്കിയാണ് വടകര എക്‌സൈസ് റെയ്ഡ് നടത്തിയത്. എടച്ചേരി പൊലിസും റവന്യു ഉദ്യോഗസ്ഥനും ഒപ്പമുണ്ടായിരുന്നു. മണിക്കൂറുകള്‍ നീണ്ട റെയ്ഡിലാണ് വാറ്റ് കേന്ദ്രം തകര്‍ത്ത് വാഷ് നശിപ്പിച്ചതും പാത്രങ്ങള്‍ കസ്റ്റഡിയിലെടുത്തതും. പുഴയോരത്ത് പൊന്തക്കാട്ടിലും ചതുപ്പിലും വലിയ ടാങ്കുകളിലും പാത്രങ്ങളിലുമായാണ് വാഷ് സൂക്ഷിച്ചിരുന്നത്. ഇവിടെ നിന്നു വാറ്റി വിവിധ കേന്ദ്രങ്ങളിലേക്ക് കൊണ്ടുപോവുകയാണ് ഉദ്ദേശ്യം. 

ഓണം കണക്കിലെടുത്ത് വ്യാജവാറ്റ് നടക്കുന്നതിനാല്‍ ഇത്തരം റെയ്ഡുകള്‍ തുടരുമെന്ന് എക്‌സൈസ് അറിയിച്ചു.