കൊച്ചി: എറണാകുളം ടൗണ്‍ഹാളില്‍ നടന്ന കണയന്നൂര്‍ താലൂക്കിലെ പരിഹാരം2017 ഓടെ ജില്ലയിലെ താലൂക്കുതല ജനസമ്പര്‍ക്കപരിപാടിക്ക് സമാപനമായി. ഇന്നലെ നടന്ന ഒന്‍പതാമത്തെയും അവസാനത്തെയും പരിഹാരം പരിപാടിയില്‍ ആകെ 433 പരാതികള്‍ പരിഗണിച്ചു. ഇതില്‍ നേരത്തെ ഓണ്‍ലൈനായി ലഭിച്ച 296 പരാതികളില്‍ 248 എണ്ണം തീര്‍പ്പാക്കി. ഓണ്‍ലൈനായി ലഭിച്ച പരാതികളില്‍ 218 എണ്ണം റവന്യൂ വകുപ്പുമായി ബന്ധപ്പെട്ടതായിരുന്നു. 137 പരാതികളാണ് ടൗണ്‍ഹാളില്‍ ഇന്നലെ തയാറാക്കിയ എട്ട് കൗണ്ടറുകളില്‍ ലഭിച്ചത്. ഇവ അതത് വകുപ്പുദ്യോഗസ്ഥരുടെ പരിഗണനയ്ക്കും ഉടന്‍ തീരുമാനത്തിനുമായി കൈമാറി.
നേരിട്ടു ലഭിച്ച 137 പരാതികളില്‍ 78എണ്ണം റവന്യു വകുപ്പുമായി ബന്ധപ്പെട്ടതാണ്. പഞ്ചായത്തുമായി ബന്ധപ്പെട്ട് 29 പരാതികളും സഹകരണ ബാങ്കുകളുമായി ബന്ധപ്പെട്ട് 12 പരാതികളും പൊലിസുമായി ബന്ധപ്പെട്ട് മൂന്ന് പരാതികളും ലഭിച്ചു. മറ്റു വകുപ്പുകളുമായി ബന്ധപ്പെട്ട് 15 പരാതികളാണ് ലഭിച്ചത്.
ഭൂമി സര്‍വേ, പോക്കുവരവ് സംബന്ധിച്ച പരാതികള്‍ പരിശോധിച്ച് നടപടികള്‍ വേഗത്തിലാക്കി റിപ്പോര്‍ട്ടു നല്കാന്‍ ജില്ലാ കലക്ടര്‍ വകുപ്പുദ്യോഗസ്ഥരോട് ആവശ്യപ്പെട്ടു. മുഖ്യമന്ത്രിയുടെ ദുരിതാശ്വാസനിധിയില്‍ നിന്നുള്ള സാമ്പത്തികസഹായത്തിനായി അക്ഷയ കൗണ്ടര്‍ വഴി ഓണ്‍ലൈനായി അപേക്ഷിക്കാന്‍ സൗകര്യമൊരുക്കിയിരുന്നു.
ഇന്നലെ നടത്തിയ അദാലത്തുള്‍പ്പെടെ ഏഴു താലൂക്കുകളില്‍ നിന്നായി 2671 പരാതികള്‍ പരിഹാരത്തില്‍ ലഭിച്ചുവെന്ന് ജില്ലാ കളക്ടര്‍ കെ മുഹമ്മദ് വൈ സഫീറുള്ള ഉദ്ഘാടനപ്രസംഗത്തില്‍ പറഞ്ഞു. ഇതില്‍ 1637 പരാതികള്‍ തീര്‍പ്പാക്കി. ബാക്കിയുള്ള 1034 പരാതികളില്‍ രണ്ടുമാസത്തിനകം തീര്‍പ്പുണ്ടാക്കുമെന്നും കലക്ടര്‍ പറഞ്ഞു. ഡെപ്യൂട്ടികലക്ടര്‍ (എല്‍.ആര്‍) സുരേഷ് കുമാര്‍ അധ്യക്ഷനായിരുന്നു. ആര്‍.ഡി.ഒ ടി.കെ വിനീത്, തഹസീല്‍ദാര്‍ വൃന്ദാദേവി, തഹസീല്‍ദാര്‍ (എല്‍.ആര്‍) ബാബു തുടങ്ങിയവര്‍ സംസാരിച്ചു.