നെടുമ്പാശ്ശേരി: കേന്ദ്ര ഹജ്ജ് കമ്മിറ്റി സംസ്ഥാനങ്ങള്‍ക്കുള്ള ക്വാട്ട നിശ്ചയിക്കുമ്പോള്‍ നിലവിലുള്ള മാനദണ്ഡം മാറ്റി അപേക്ഷകള്‍ക്ക് ആനുപാതികമാക്കാന്‍ കേന്ദ്ര സര്‍ക്കാരില്‍ സമ്മര്‍ദ്ദം ചെലുത്തുമെന്ന് മുന്‍ കേന്ദ്രമന്ത്രി കെ.സി.വേണുഗോപാല്‍ എം.പി പറഞ്ഞു. 

നെടുമ്പാശ്ശേരി ഹജ്ജ് ക്യാംപില്‍ തീര്‍ത്ഥാടകരോട് സംസാരിക്കുകയായിരുന്നു അദ്ധേഹം. ഇപ്പോള്‍ ഓരോ സംസ്ഥാനത്തെയും മുസ് ലിം ജനസംഖ്യക്ക് ആനുപാദികമായാണ് ക്വാട്ട വീതിച്ചു നല്‍കുന്നത്. എന്നാല്‍ ഇത് അപേക്ഷകളുടെ അടിസ്ഥാനത്തിലാക്കിയാല്‍ ഇന്ത്യയില്‍ ഏറ്റവും കൂടുതല്‍ ഹജ്ജ് അപേക്ഷകരുള്ള കേരളത്തിന് കൂടുതല്‍ ആനുകൂല്യം ലഭ്യമാകാന്‍ സഹായകമാകുമെന്ന് അദ്ധേഹം പറഞ്ഞു. വിശ്വാസിയുടെ ജീവിതത്തിലെ ഏറ്റവും പുണ്യകരവും അത്യപൂര്‍വ്വവുമായ കര്‍മ്മമാണ് ഹജ്ജ് എന്ന് വേണുഗോപാല്‍ പറഞ്ഞു.
സംസ്ഥാന ഹജ്ജ് കമ്മിറ്റി ചെയര്‍മാന്‍ തൊടിയൂര്‍ മുഹമ്മദ് കുഞ്ഞ് മൗലവി അധ്യക്ഷനായിരുന്നു.മുന്‍ കെ.പി.സി.സി പ്രസിഡന്റ് വി.എം.സുധീരന്‍ തീര്‍ത്ഥാടകര്‍ക്ക് യാത്രാമംഗളങ്ങള്‍ നേര്‍ന്നു.
ഹജ്ജ് കമ്മിറ്റി അംഗങ്ങളായ എ.കെ.അബ്ദുള്‍ റഹ്മാന്‍, മുഹമ്മദ് ചായിന്റടി, ഷെരീഫ് മണിയാട്ടുകുടി, എച്ച്.ഇ.മുഹമ്മദ് ബാബു സേട്ട്, അഹമ്മദ് മൂപ്പന്‍, പ്രൊഫ.അബ്ദുള്‍ ഹമീദ്,അസി.സെക്രട്ടറി ടി.കെ.അബ്ദുള്‍ റഹ്മാന്‍,ഹജ്ജ് സെല്‍ ഓഫീസര്‍ അബ്ദുള്‍ ലത്തീഫ്, ക്യാംപ് ഓഫീസര്‍ യു. അബ്ദുള്‍ കരീം, കോഓര്‍ഡിനേറ്റര്‍ എന്‍.പി.ഷാജഹാന്‍ തുടങ്ങിയവര്‍ സംസാരിച്ചു.