കോട്ടയം: ശുചിത്വ മിഷന്‍ തദ്ദേശ സ്വയംഭരണ സ്ഥാപനങ്ങളുമായി ചേര്‍ന്ന് സ്ഥാപിച്ചിട്ടുള്ളതും തുടര്‍ന്ന് സ്ഥാപിക്കുവാന്‍ ഉദ്ദേശിക്കുന്നതുമായ മാലിന്യ സംസ്‌ക്കരണ ഉപാധികളുടെ പരിപാലനം, അറ്റകുറ്റപ്പണികള്‍, പുതിയവ സ്ഥാപിക്കല്‍, മെറ്റീരിയല്‍ റിക്കവറി ഫെസിലിറ്റി സെന്ററുകളുടെ മാനേജ്‌മെന്റ് തുടങ്ങിയ പ്രവര്‍ത്തനങ്ങള്‍ എന്നിവ സംബന്ധിച്ച് ജില്ലയിലെ തെരഞ്ഞെടുക്കപ്പെട്ട ഗ്രീന്‍ ടെക്‌നീഷ്യന്‍മാര്‍ക്ക് പരിശീലനം കോട്ടയം തെള്ളകം ചൈതന്യം ട്രെയ്‌നിങ് സെന്ററില്‍ ജില്ലാ പഞ്ചായത്ത് പ്രസിഡന്റ് സഖറിയാസ് കുതിരവേലി ഉദ്ഘാടനം ചെയ്തു.
ജില്ലയെ മാലിന്യമുക്തമാക്കുന്നതിനുള്ള പ്രവര്‍ത്തനങ്ങളില്‍ ഗ്രീന്‍ ടെക്‌നീഷ്യന്‍മാരുടെ സേവനം അനിവാര്യമാണെന്നും ജില്ലാ ശുചിത്വ മിഷന്റെ ഈ മേഖലയിലുള്ള ഇടപെടല്‍ അഭിനന്ദനാര്‍ഹമാണെന്നും അദ്ദേഹം അഭിപ്രായപ്പെട്ടു. മാലിന്യ സംസ്‌ക്കരണവുമായി ബന്ധപ്പെട്ട വിവിധ മേഖലകളില്‍ നിന്നുള്ള വിദഗ്ധര്‍ ക്ലാസെടുക്കും.