അരീക്കോട്: ഒന്നരക്കിലോ കഞ്ചാവുമായി വെസ്റ്റ് ബംഗാള്‍ സ്വദേശി പൊലിസിന്റെ പിടിയിലായി. മൂര്‍സലിം ഷാ (34)യെയാണ് അരീക്കോട് പൊലിസ് കാവനൂരില്‍നിന്നും അറസ്റ്റ് ചെയ്തത്. പൊലിസിന് ലഭിച്ച സ്യ വിവരത്തിന്റെ അടിസ്ഥാനത്തില്‍ നടത്തിയ പരിശോധനയിലാണ് പ്രതി വലയിലായത്. കോഴിക്കോട് ജില്ലയിലെ ചെറുവാടി ഭാഗത്ത് വാടകക്ക് താമസിക്കുന്ന പ്രതി ബംഗാളില്‍ നിന്നും കഞ്ചാവ് മൊത്തമായി കൊണ്ടുവന്ന് വില്‍പന നടത്തുകയാണ് ചെയ്യുന്നതെന്ന് പൊലിസ് പറഞ്ഞു.
ചെറിയ പായ്ക്കറ്റുകളിലാക്കി വിദ്യാര്‍ഥികള്‍ ഉള്‍പ്പെടെയുള്ളവര്‍ക്ക് എത്തിച്ച് കൊടുക്കുകയാണ് ഇയാളുടെ രീതി. കവനൂരില്‍ വിദ്യാര്‍ഥികള്‍ക്ക് കഞ്ചാവ് നല്‍കുന്നതിനിടെയാണ് പ്രതി പിടിക്കപ്പെട്ടത്. ഇയാളുടെ കൈവശം ഉണ്ടായിരുന്ന കിറ്റില്‍ ഒളിപ്പിച്ച് നിലയിലായിരുന്നു കഞ്ചാവ് ഉണ്ടായിരുന്നത്. വില്‍പനയ്ക്കായി ഉപയോഗിക്കുന്ന ചെറിയ പായ്ക്കറ്റുകളും കസ്റ്റഡിയിലെത്തു.
പ്രതിയെ ഇന്ന് കോടതിയില്‍ ഹാജരാക്കും. അരീക്കോട് എസ്.ഐ കെ.സിനോദ്, സി.പി.ഒമാരായ സിനോജ്, പ്രജീഷ് കുമാര്‍, ജിഗിഷ്, പ്രജിഷ്, ഹോം ഗാര്‍ഡ് മോഹന്‍ദാസ് എന്നിവരടങ്ങിയ സംഘമാണ് പ്രതിയെ പിടികൂടിയത്.