കോഴിക്കോട്: സര്‍ക്കാര്‍ അവഗണനയില്‍ പ്രതിഷേധിച്ച് തിരുവോണനാളില്‍ പട്ടിണി സമരം നടത്തുമെന്ന് ആള്‍ കേരള റീട്ടെയ്ല്‍ റേഷന്‍ ഡീലേഴ്‌സ് അസോസിയേഷന്‍ ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു. ജില്ലാ ആസ്ഥാനങ്ങളിലും സെക്രട്ടേറിയറ്റിന് മുന്നിലുമാണ് സമരം നടത്തുക.
350 കാര്‍ഡുകളുള്ള റേഷന്‍ കടയുടമയ്ക്ക് പ്രതിമാസ വേതനം 16,000 രൂപയായി വര്‍ധിപ്പിച്ച സര്‍ക്കാര്‍ പ്രഖ്യാപനം ഇതുവരെ നടപ്പായിട്ടില്ല. മുടങ്ങിക്കിടന്ന ഏഴുമാസത്തെ കമ്മിഷന്‍ കുടിശ്ശികയില്‍ നിന്ന് രണ്ടുമാസത്തെ തുക അനുവദിച്ചെങ്കിലും ആദായ നികുതി അടയ്ക്കണമെന്ന ആവശ്യമുന്നയിച്ച് ഇതും തടഞ്ഞുവച്ചു. മുഖ്യമന്ത്രി പ്രഖ്യാപിച്ച വേതന പാക്കേജ് ഉടന്‍ നടപ്പാക്കുക, സര്‍ക്കാല്‍ ചെലവില്‍ റേഷന്‍ കടകള്‍ നവീകരിച്ച് കംപ്യൂട്ടര്‍വല്‍കരിക്കുകയും ഇ-പോസ് മെഷിന്‍ സ്ഥാപിക്കുകയും ചെയ്യുക, ഓണത്തിന് മുന്‍പായി മുഴുവന്‍ കമ്മിഷന്‍ തുകയും ഫെസ്റ്റിവല്‍ അലവന്‍സും അനുവദിക്കുക, ആദായനികുതി ഈടാക്കുന്നത് ഒഴിവാക്കുക തുടങ്ങിയ ആവശ്യങ്ങള്‍ പരിഗണിച്ചില്ലെങ്കില്‍ സെപ്റ്റംബര്‍ മുതല്‍ നിസ്സഹകരണ സമരം നടത്തും.
വാര്‍ത്താസമ്മേളനത്തില്‍ സംസ്ഥാന ജനറല്‍ സെക്രട്ടറി ടി. മുഹമ്മദാലി, ട്രഷറര്‍ ഇ. അബൂബക്കര്‍ ഹാജി, സി.വി മുഹമ്മദ്, പി. പവിത്രന്‍ എന്നിവര്‍ പങ്കെടുത്തു.