സിസിലി വിന്‍സെന്റ് എന്ന ഒറ്റയാള്‍ പോരാളിയെ കുറിച്ചുള്ള ഫീച്ചര്‍(ലക്കം 153) വായിച്ചു തീര്‍ന്നപ്പോള്‍ ശരിക്കും ഉള്ളില്‍ രോഷമാണുണര്‍ന്നത്. സംസ്ഥാനത്തിനു വേണ്ടി തുടര്‍ച്ചയായി പത്തിനടുത്തു വര്‍ഷങ്ങളായി ദേശീയ ചാംപ്യന്‍ഷിപ്പില്‍ മത്സരിക്കുന്ന, അടുത്ത സെപ്റ്റംബറില്‍ ലണ്ടനില്‍ നടക്കുന്ന ലോക മാമാങ്കത്തില്‍ രാജ്യത്തെ തന്നെ പ്രതിനിധീകരിക്കാനിരിക്കുന്ന ഒരു സ്ത്രീയെ അധികാരിവര്‍ഗം ഇനിയും അറിഞ്ഞിട്ടു പോലുമില്ലെന്ന വിവരം ഞെട്ടലുളവാക്കുന്നതാണ്. കായികരംഗത്തു നിലനില്‍ക്കുന്ന അരുതായ്മകള്‍ അടുത്തിടെ പി.യു ചിത്രയുടെ അനുഭവത്തിലൂടെ മാധ്യമങ്ങളിലെല്ലാം നിറഞ്ഞത് നാം കണ്ടതാണ്. കായികരംഗത്തിന്റെയും സ്ത്രീ സമൂഹത്തിന്റെയുമൊക്കെ ഉന്നതിക്കായി പ്രവര്‍ത്തിക്കുന്നുവെന്നു വിളിച്ചുകൂവി നടക്കുന്നവരുടെ കണ്ണില്‍ തൃശൂര്‍ നഗരത്തില്‍ പത്രം വിറ്റു നടക്കുന്ന സിസിലി വിന്‍സെന്റ് എന്ന ദേശീയ മാസ്റ്റേഴ്‌സ് അത്‌ലറ്റിക്‌സ് ചാംപ്യന്‍ എന്നാണ് പ്രത്യക്ഷപ്പെടുക?