തൃക്കരിപ്പൂര്‍: അടുത്തമാസം അഞ്ചിനു കവ്വായി കായലില്‍ മെട്ടമ്മല്‍ ബ്രദേഴ്‌സ് സംഘടിപ്പിക്കുന്ന എ.പി.ജെ അബ്ദുല്‍ കലാം മെമ്മോറിയല്‍ സ്വര്‍ണക്കപ്പിനു വേണ്ടിയുള്ള മൂന്നാമതു മലബാര്‍ ജലോത്സവത്തിന്റെ പ്രചരണാര്‍ഥം സംഘടിപ്പിച്ച സൈക്കിള്‍ റൈഡിങ് സമാപിച്ചു. തിരുവനന്തപുരത്തു നിന്നു തുടക്കം കുറിച്ച സൈക്കിള്‍ റൈഡിങ് ഇന്നലെ തൃക്കരിപ്പൂരിന്റെ അതിര്‍ത്തിയായ ഒളവറയില്‍ ശിങ്കാരി, നാസിക് വാദ്യമേളങ്ങളുടെയും നിരവധി കായിക സംഘാടകരുടെയും നേതൃത്വത്തിലുള്ള സ്വീകരണമേറ്റുവാങ്ങി തൃക്കരിപ്പൂര്‍ ടൗണ്‍ ചുറ്റി എട്ടമ്മലില്‍ സമാപിച്ചു.
സമാപന ചടങ്ങ് ചന്തേര എസ്.ഐ കെ.വി ഉമേശന്‍ ഉദ്ഘാടനം ചെയ്തു. സംഘാടക സമിതി വര്‍ക്കിങ് ചെയര്‍മാന്‍ വി.വി ആരിസ് അധ്യക്ഷനായി. കണ്‍വീനര്‍ കെ. ഗംഗാധരന്‍, ക്ലബ് സെക്രട്ടറി ജുനൈദ് മെട്ടമ്മല്‍ സംസാരിച്ചു. തിരുവനന്തപുരത്തു നിന്നു ജലോത്സവത്തിന്റെ പ്രചരണത്തിനായി 'കായല്‍ സംരക്ഷിക്കൂ' എന്ന മുദ്രാവാക്യവുമായി സൈക്കിളില്‍ സഞ്ചരിച്ച റൈഡര്‍മാരായ വി.സി ഉമ്മര്‍, കെ. നൗഫല്‍, എന്‍.കെ.പി ഇംത്യാസ്, സി. അഷ്ഫാഖ്, ടി. മുസ്തഫ, വി.വി ഷുഹൈബ്, എ.ജി മര്‍സൂഖ്, വി.വി ഷരീഫ്, കെ. നസീര്‍ എന്നിവരെ നാട്ടുകാരും കായിക പ്രേമികളും സ്വീകരിച്ചു.