കല്‍പ്പറ്റ: ഡി.ടി.പി.സിയുടെ ആഭിമുഖ്യത്തിലുള്ള ജില്ലാതല ഓണം വാരാഘോഷം 'ഓണം മെഗാ ഫെസ്റ്റിവല്‍' സെപ്റ്റംബര്‍ മൂന്നുമുതല്‍ ഒന്‍പതുവരെ നടക്കും. ജില്ലാതല ഉദ്ഘാടനം സുല്‍ത്താന്‍ ബത്തേരിയിലും സമാപനം കല്‍പ്പറ്റയിലുമാണ് സംഘടിപ്പിക്കുക.
സമാപനത്തോട് അനുബന്ധിച്ച് കല്‍പ്പറ്റ വിജയ പമ്പിന് സമീപം വിപുലമായ സാംസ്‌കാരിക പരിപാടികളും ഒരുക്കും. സമാപന ദിവസം കലക്ടറേറ്റില്‍ നിന്ന് ഘോഷയാത്ര ആരംഭിച്ച് വിജയപമ്പ് ജങ്ഷനില്‍ സമാപിക്കും.ഓണാഘോഷത്തിന്റെ ഭാഗമായി ജില്ലയിലെ വിവിധ ടൂറിസം കേന്ദ്രങ്ങളായ പൂക്കോട് തടാകം, കര്‍ലാട് അഡ്വഞ്ചര്‍ ക്യാംപ്, കാന്തന്‍പാറ വെള്ളച്ചാട്ടം, പഴശ്ശി സ്മാരകം, എടക്കല്‍ ഗുഹ, കുറുവ ദ്വീപ്, ബത്തേരി ടൗണ്‍ സ്‌ക്വയര്‍ എന്നിവിടങ്ങളില്‍ പ്രത്യേക ഓണാഘോഷ പരിപാടികള്‍ സംഘടിപ്പിക്കും. ഘോഷയാത്രയില്‍ മികച്ച ഫ്‌ളോട്ടുകള്‍ അവതരിപ്പിക്കുന്നവര്‍ക്ക് സമ്മാനം നല്‍കും.
വടംവലി മത്സരം, കബടി, അമ്പെയ്ത്ത് മത്സരം, പൂക്കള മത്സരം, ജലസാഹസിക യാത്ര, ട്രക്കിങ് എന്നിവയും സംഘടിപ്പിക്കുന്നുണ്ട്. വയനാട് പ്രസ്‌ക്ലബും ഡി.ടി.പി.സിയും സഹകരിച്ചായിരിക്കും ജില്ലാതല പൂക്കള മത്സരം സംഘടിപ്പിക്കുക. കലക്ടറേറ്റിലെ റിക്രിയേഷന്‍ ക്ലബുമായി സഹകരിച്ചും ഓണാഘോഷ പരിപാടികള്‍ സംഘടിപ്പിക്കുന്നുണ്ട്. ജില്ലാ കലക്ടറുടെ പ്ലാസ്റ്റിക് ഫ്രീ വയനാട് പദ്ധതിയുടെ ഭാഗമായി പ്ലാസ്റ്റിക് ഫ്രീ ഓണം എന്ന ആശയത്തിന് മുന്‍തൂക്കം നല്‍കിക്കൊണ്ടായിരിക്കും പരിപാടികള്‍ സംഘടിപ്പിക്കുക.