കോട്ടക്കല്‍: കുറ്റിപ്പുറത്തുകാവ് ഭഗവതി ക്ഷേത്രത്തിണ്ട്രണ്ടു ഭണ്ഡാരങ്ങള്‍ തകര്‍ത്തു മോഷണം. കഴിഞ്ഞ ദിവസം രാത്രിയാണ് സംഭവം. 30,000 രൂപയും വിഗ്രഹത്തിന് അണിയിച്ചിരുന്ന ആഭരണവും നഷ്ടപ്പെട്ടിട്ടുണ്ട്. പഞ്ചലോഹ വിഗ്രഹം തകര്‍ക്കുകയും അതിലണിഞ്ഞ ആഭരണം മോഷ്ടിക്കുകയും ചെയ്തിട്ടുണ്ട്. ഇന്നലെ പുലര്‍ച്ചെ അഞ്ചോടെയെത്തിയ പൂജാരിയാണ് ക്ഷേത്രവാതിലുകള്‍ തുറന്നുകിടക്കുന്നതു കണ്ടത്. തുടര്‍ന്നു നടത്തിയ പരിശോധനയിലാണ് മോഷണവിവരം അറിയുന്നത്. ഓടുകള്‍ തകര്‍ത്താണ് മോഷ്ടാവ് അകത്തുകടന്നിരിക്കുന്നത്. തിരൂര്‍ ഡിവൈ.എസ്.പി പി.വി.എ ഉല്ലാസ്, സ്‌പെഷല്‍ ബ്രാഞ്ച് ഡിവൈ.എസ്.പി ഉല്ലാസ് കുമാര്‍, സി.ഐമാരായ എം.കെ ഷാജി, കെ.എസ് ബിജു, എസ്.ഐ ആര്‍. വിനോദ് എന്നിവരുടെ നേതൃത്വത്തില്‍ പൊലിസ് സംഘം സ്ഥലത്തെത്തി. മലപ്പുറത്തുനിന്നു ഡോഗ് സ്‌ക്വാഡും വിരലടയാള വിദഗ്ധരും സ്ഥലത്തെത്തി പരിശോധന നടത്തി.  സംഭവത്തില്‍ പ്രതികളെ ഉടന്‍ പിടികൂടണമെന്നു മുനിസിപ്പല്‍ മുസ്‌ലിംലീഗ് കമ്മിറ്റി ആവശ്യപ്പെട്ടു.