തേഞ്ഞിപ്പലം: കാലിക്കറ്റ് യൂനിവേഴ്‌സിറ്റി സിന്തറ്റിക് സ്റ്റേഡിയത്തില്‍ നടക്കുന്ന മലപ്പുറം ജില്ലാ അത്‌ലറ്റിക്‌സ് മീറ്റ് ഇന്നു സമാപിക്കും. അത്‌ലറ്റിക് അസോസിയേഷന്‍ അംഗത്വമുള്ള 32 ടീമുകള്‍ പങ്കെടുത്ത മത്സരത്തില്‍ 135 ഇനങ്ങളില്‍ 66 ഫൈനല്‍ മത്സരങ്ങള്‍ അവസാനിച്ചപ്പോള്‍ ഐഡിയല്‍ ഇംഗ്ലീഷ് സ്‌കൂള്‍ കടകശ്ശേരി 407 പോയിന്റുകള്‍നേടി ബഹുദൂരം മുന്നിലാണ്.
208 പോയിന്റ് നേടിയ സി.പി.ഇ കാലിക്കറ്റ് യൂനിവേഴ്‌സിറ്റി രണ്ടാംസ്ഥാനത്തും 150.5 പോയിന്റ് നേടി ഐഡിയല്‍ കോളജ് കടകശ്ശേരി മൂന്നാം സ്ഥാനത്തുമാണ്. കെ.എച്ച്.എം.എച്ച്.എസ് വാളക്കുളം 77.5, പി.എച്ച്.എസ്.എസ് പന്തല്ലൂര്‍ 75, സി.എച്ച്.എം.എച്ച്.എസ് പൂക്കൊളത്തൂര്‍ 63 എന്നിവര്‍ യഥാക്രമം മൂന്നും നാലും അഞ്ചും സ്ഥാനങ്ങളിലുണ്ട്. ഇന്നു വൈകിട്ട് നടക്കുന്ന സമാപന ചടങ്ങ് പി. അബ്ദുല്‍ ഹമീദ് എം.എല്‍.എ ഉദ്ഘാടനം ചെയ്യും. കാലിക്കറ്റ് യൂനിവേഴ്‌സിറ്റി കായിക വിഭാഗം മേധാവി ഡോ. സക്കീര്‍ ഹുസൈന്‍ അധ്യക്ഷനായി. ജില്ലാപഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍ സമ്മാനവിതരണം നടത്തും.