തൃപ്പൂണിത്തുറ: കോണത്തുപ്പുഴയിലെ കുഞ്ഞോളങ്ങളെ കീറി മുറിച്ചു കൊണ്ട് ഉദയംപേരൂര്‍ തെക്കന്‍ പറവൂര്‍ സെന്റ് ജോണ്‍സ് സ്‌കൂള്‍ കടവില്‍ നടക്കുന്ന കോണത്തുപ്പുഴ ജലോത്സവം ഇന്ന് ഉച്ചയ്ക്ക് രണ്ടിന് മന്ത്രി ഇ ചന്ദ്രശേഖരന്‍ ഉത്ഘാടനം ചെയ്യും. പുഴയുടെ രക്ഷക്കായി ഒരു ജനകീയ കൂട്ടായ്മ എന്ന സന്ദേശവുമായാണ് ജലോത്സവം സംഘടിപ്പിച്ചിരിക്കുന്നത്. ജല രാജാക്കന്‍മാരായ എട്ടോളം ഇരുട്ടു കുത്തി വള്ളങ്ങള്‍ പങ്കെടുക്കുന്നുണ്ട്. എ ഗ്രേഡ് വിഭാഗത്തില്‍ കാരപ്പറമ്പില്‍ എവര്‍റോളിങ്ങ് ട്രോഫിക്കും, ബി ഗ്രേഡ് വിഭാഗത്തില്‍ കെ അംബുജം സ്മാരക ട്രോഫിക്കും വേണ്ടിയുള്ള മത്സരമാണ് നടക്കുന്നത്.
ഡെപ്യൂട്ടി സ്പീക്കര്‍ പി.ശശി വിജയികള്‍ക്ക് ട്രോഫികള്‍ സമ്മാനിക്കും. ചടങ്ങില്‍ നെഹ്‌റു ട്രോഫി വള്ളംകളി ജേതാക്കളായ സി.ജി. അശോകന്‍, വി.ജി.ബിനിലില്‍ എന്നിവരെ ആദരിക്കും. സംഘാടക സമിതി ചെയര്‍മാന്‍ ടി രഘുവരന്‍ അധ്യക്ഷത വഹിക്കും. ജലോത്സവം സി.പി.ഐ ജില്ലാ സെക്രട്ടറി പി രാജു ഫ്‌ലാഗ് ഓഫ് ചെയ്യും. പ്രൊഫ.കെ.വി തോമസ് എം.പി മുഖ്യാതിഥി ആയിരിക്കും. ജലോത്സവത്തിന്റെ സുവനീര്‍ പ്രകാശനം ജില്ലാ പഞ്ചായത്ത് പ്രസിഡന്റ് ആശാ സനില്‍ നിര്‍വഹിക്കും.