കണ്ണൂര്‍: സ്വാശ്രയ മാനേജ്‌മെന്റിന് അനുകൂലമായ സുപ്രിം കോടതി വിധി ഖേദകരമെന്ന് മന്ത്രി കെ.കെ ശൈലജ. വിധി യാതൊരുതരത്തിലും സര്‍ക്കാരിനു തിരിച്ചടിയല്ല. വിദ്യാര്‍ഥികള്‍ക്കു വേണ്ടിയാണ് സര്‍ക്കാര്‍ നിലകൊണ്ടത്. നിരന്തരം കോടതിയെ സമീപിച്ചതിലൂടെയാണു മാനേജ്‌മെന്റുകള്‍ വിധി നേടിയെടുക്കുന്നതെന്നും സ്വാശ്രയ മാനേജ്‌മെന്റിന്റെ അത്യാര്‍ത്തി തുടരുന്നിടത്തോളം കാലം കുട്ടികള്‍ക്കും രക്ഷിതാക്കള്‍ക്കും അനുകൂലമായ രീതിയില്‍ നടപടി സ്വീകരിക്കാന്‍ കഴിയാത്ത സ്ഥിതിയാണെന്നും അവര്‍ മാധ്യമപ്രവര്‍ത്തകരോട് പറഞ്ഞു.
സര്‍ക്കാരിന്റെ ഭാഗത്തുനിന്ന് യാതൊരു വീഴ്ചയും ഉണ്ടായിട്ടില്ല. കോടതിയില്‍ അറ്റോര്‍ണി ജനറലിനെയാണു ചുമതലപ്പെടുത്തിയത്. ബാങ്ക് ഗ്യാരണ്ടി എടുത്തുകളയണമെന്നു നേരത്തെ സര്‍ക്കാര്‍ വാദിച്ചിരുന്നു. ഫീസ് അഞ്ചുലക്ഷത്തില്‍നിന്ന് മാറ്റം വരുത്താത്തത് ആശ്വാസമുണ്ടാക്കുന്നുണ്ട്. മാനേജ്‌മെന്റിന് അനുകൂലമായി ഇത്തരം വിധികള്‍ വരുന്നതില്‍ ദുഃഖമുണ്ട്. സര്‍ക്കാര്‍ ചെയ്യേണ്ടതെല്ലാം ഇതുവരെ ചെയ്തു. സുപ്രിംകോടതി നിര്‍ദേശപ്രകാരം വരുന്ന 31ന് അലോട്ട്‌മെന്റ് നടപടികള്‍ മുഴുവന്‍ പൂര്‍ത്തിയാക്കുമെന്നും മന്ത്രി ശൈലജ പറഞ്ഞു.