തിരുവനന്തപുരം: സംസ്ഥാനത്തെ സര്‍ക്കാര്‍ മെഡിക്കല്‍, സ്വാശ്രയ കോളജുകളിലേക്കുള്ള പ്രവേശനം ആരംഭിച്ചു. പ്രവേശനം ഇന്നും തുടരും.
ഇന്ന്് വൈകിട്ട് അഞ്ചിനുശേഷം എം.ബി.ബി.എസ്, ബി.ഡി.എസ് കോഴ്‌സുകളില്‍ ഒഴിവുള്ള സീറ്റുകള്‍ നിലനില്‍ക്കുന്ന പക്ഷം അവ നികത്താന്‍ 30നും 31നും പ്രവേശന കമ്മിഷണര്‍ തിരുവനന്തപുരത്ത് സര്‍ക്കാര്‍ മെഡിക്കല്‍ കോളജിലെ പഴയ ഓഡിറ്റോറിയത്തില്‍ സ്‌പോട്ട് അഡ്മിഷന്‍ നടത്തും.
എം.ബി.ബി.എസ്, ബിഡിഎസ് കോഴ്‌സുകളിലേക്ക് മാത്രമായിരിക്കും സ്‌പോട്ട് അഡ്മിഷന്‍. ഇതില്‍ വിദ്യാര്‍ഥികള്‍ക്ക് പ്രവേശനം ലഭിക്കുന്ന പക്ഷം അവിടെത്തന്നെ നിര്‍ദിഷ്ട ഫീസ് ഒടുക്കി പ്രവേശനം നേടണം.
പ്രവേശന യോഗ്യത തെളിയിക്കുന്ന സര്‍ട്ടിഫിക്കറ്റുകള്‍, വിടുതല്‍ സര്‍ട്ടിഫിക്കറ്റ് എന്നിവ ഹാജരാക്കുന്നവരെയാണ് സ്‌പോട്ട് അഡ്മിഷനില്‍ പങ്കെടുക്കാന്‍ അനുവദിക്കുക.
ഹൈക്കോടതിയുടെ വെള്ളിയാഴ്ചത്തെ ഉത്തരവ് പ്രകാരം 31ന് ശേഷം ബി.ഡി.എസ് കോഴ്‌സില്‍ ഒഴിവ് നിലനില്‍ക്കുന്ന പക്ഷം അവ നികത്താന്‍ സെപ്റ്റംബര്‍ രണ്ട്, മൂന്ന് തിയതികളില്‍ പ്രവേശന പരീക്ഷാ കമ്മിഷണര്‍ തിരുവനന്തപുരത്ത് ഒരു സ്‌പോട്ട് അഡ്മിഷന്‍ കൂടി നടത്തും.