വടകര: ഗതാഗത നിയമങ്ങള്‍ ലംഘിച്ച് കുതിച്ചുപാഞ്ഞ ബസ് മറ്റൊരു ബസിലിടിച്ച് നിരവധിപേര്‍ക്ക് പരുക്കേറ്റു.
ഇന്നലെ ഉച്ചക്ക് രണ്ടരയോടെയാണ് അപകടം. വടകരയില്‍നിന്നും തലശ്ശേരിയിലേക്ക് പോകുന്ന കെ.എല്‍-18 ക്യു. 6309 നമ്പര്‍ പറശ്ശിനി ബസും വടകര പേരാമ്പ്ര റൂട്ടിലോടുന്ന കെ.എല്‍ 18 ആര്‍. 3789 ഡിയേര്‍സ് ബസുമാണ് അപകടത്തില്‍പെട്ടത്. പേരാമ്പ്രക്കു പോവുകയായിരുന്ന ബസ് പഴയ സ്റ്റാന്റില്‍നിന്ന് പുറത്തേക്കു പോകേണ്ട വഴി ലംഘിച്ച് വന്ന വഴിയിലൂടെതന്നെ അമിതവേഗതയില്‍ പുറത്തേക്കെടുത്തതാണ് അപകടത്തിന് കാരണം. ഇടിയുടെ ആഘാതത്തില്‍ ഇരു ബസുകളുടെയും മുന്‍വശം തകര്‍ന്നു. പരുക്കേറ്റവരെ വടകരയിലെ വിവിധ ആശുപത്രികളില്‍ പ്രവേശിപ്പിച്ചു. ആരുടെയും പരുക്ക് ഗുരുതരമല്ല.