കമ്പളക്കാട്: കഴിഞ്ഞ ദിവസം കമ്പളക്കാട് ടൗണിലെ നോപാര്‍ക്കിങ് ഏരിയയില്‍ വാഹനം നിര്‍ത്തിയതിനെ തുടര്‍ന്ന് പൊലിസ് പിഴ ഈടാക്കിയതുമായി ബന്ധപ്പെട്ടുണ്ടായ അനിഷ്ട സംഭവങ്ങളില്‍ പൊലിസ് 16 പേര്‍ക്കെതിരേ കേസെടുത്തു. തിരിച്ചറിഞ്ഞ ആറുപേര്‍ക്കെതിരേയും കണ്ടാലറിയാവുന്ന 10 പേര്‍ക്കെതിരേയുമാണ് കേസെടുത്തത്.
പൊലിസിന്റെ കൃത്യനിര്‍വഹണം തടസപ്പെടുത്തിയതടക്കമുള്ള ജാമ്യമില്ലാ വകുപ്പുകളിലാണ് ഇവര്‍ക്കെതിരേ കേസെടുത്തിരിക്കുന്നത്. കഴിഞ്ഞ ദിവസം രാവിലെ 11ഓടെ നോപാര്‍ക്കിങിലെ തന്റെ വാഹനത്തിന് പിഴ ചുമത്തിയത് പോലെ മറ്റ് വാഹനങ്ങള്‍ക്കും പിഴ ചുമത്തണമെന്ന് ആവശ്യപ്പെട്ട് പ്രദേശത്തെ അഷ്‌റഫ് നടത്തിയ പ്രതിഷേധമാണ് അനിഷ്ട സംഭവങ്ങളില്‍ കലാശിച്ചത്. ടൗണില്‍ ഏറെനേരം സംഘര്‍ഷാവസ്ഥ ഉണ്ടാക്കിയ സംഭവത്തിനിടെ പൊലിസ് മര്‍ദിച്ചെന്ന് ആരോപിച്ച അഷ്‌റഫ് ഇപ്പോള്‍ കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയിലാണ്.
ഇയാളടക്കമുള്ള 16 പേര്‍ക്കെതിരേയാണ് ഇപ്പോള്‍ പൊലിസ് കേസ് രജിസ്റ്റര്‍ ചെയ്തിരിക്കുന്നത്. ഇതില്‍ അഷ്‌റഫിനെ കയറ്റിയ പൊലിസ് വാഹനം തടഞ്ഞതിനാണ് തിരിച്ചറിഞ്ഞ അഞ്ചുപേര്‍ക്കെതിരേ കേസെടുത്തതെന്ന് കമ്പളക്കാട് പൊലിസ് പറഞ്ഞു. മറ്റുള്ളവര്‍ തൊട്ടുമുന്‍പ് നടന്ന പ്രതിഷേധങ്ങളില്‍ പങ്കെടുത്തവരാണ്. ഞായറാഴ്ച രാത്രി 11ഓടെ കേസില്‍ പ്രതിചേര്‍ക്കപ്പെട്ടവര്‍ക്കായി പൊലിസ് ടൗണിലും പരിസര പ്രദേശങ്ങളിലും അന്വേഷണം നടത്തിയിരുന്നു.
എന്നാല്‍ ആരെയും അറസ്റ്റ് ചെയ്തിട്ടില്ല. അതേസമയം വിഷയത്തില്‍ തുല്ല്യനീതി ലഭിക്കണമെന്ന് ആവശ്യപ്പെട്ട് അഷ്‌റഫ് കോഴിക്കോട് മെഡിക്കല്‍ കോളജില്‍ നിരാഹാരമിരിക്കുകയാണ്. അതിനിടെ പ്രതികളെ അറസ്റ്റ് ചെയ്യണമെന്ന് ആവശ്യപ്പെട്ട് സി.പി.എം ഞായറാഴ്ച പൊലിസ് സ്‌റ്റേഷനിലേക്ക് നടത്തിയ മാര്‍ച്ച് വിവാദമായിട്ടുണ്ട്. മാര്‍ച്ചിന് ശേഷം സ്‌റ്റേഷന്‍ കോംപൗണ്ടിനുള്ളില്‍വച്ച് ലോക്കല്‍ സെക്രട്ടറി പ്രസംഗിച്ചതാണ് വിവാദമായിരിക്കുന്നത്. ഇതിനെതിരെയും നടപടി വേണമെന്ന ആവശ്യത്തിലാണ് യു.ഡി.എഫ് നേതാക്കള്‍.