കൊട്ടിയൂര്‍: കൊട്ടിയൂര്‍ പഞ്ചായത്തിലെ വെങ്ങാലോടിയില്‍ കാറുകളും ഓട്ടോറിക്ഷയും കൂട്ടിയിടിച്ച് എട്ട് പേര്‍ക്ക് പരുക്കേറ്റു. ഇന്നലെ 4.30ഓടെയാണ് അപകടം. പരുക്കേറ്റവരെ തലശ്ശേരി ഇന്ദിരാഗാന്ധി ആശുപത്രിയിലും വയനാട്ടിലെ ആശുപത്രിയിലും പ്രവേശിപ്പിച്ചു.
അമ്പായത്തോട്ടിലെ വാദ്യാമ്പള്ളി ഷാജിയുടെ കാറാണ് അപകടത്തില്‍പെട്ടത്. ഷാജിയുടെ അമ്മ അച്ചകുട്ടി (72), ഷാജി (50), മക്കളായ റേച്ചല്‍ (16), എബിന്‍ (14), ഓട്ടോറിക്ഷയില്‍ യാത്ര ചെയ്ത തങ്കമ്മ (50), മഞ്ജു (24), ഓട്ടോ ഡ്രൈവര്‍ ജോബി (30), വയനാട് സ്വദേശിയായ ഇബ്രാഹിം തരുവണ(50) എന്നിവര്‍ക്കാണ് പരുക്കേറ്റത്. കാര്‍ ഓട്ടോറിക്ഷയെ ഓവര്‍ടേക്ക് ചെയ്തതിന് ശേഷം എതിരെ വന്ന കാറില്‍ ഇടിക്കുകയായിരുന്നു. കാര്‍ ഓട്ടോറിക്ഷയില്‍ തട്ടി ഓട്ടോറിക്ഷ തലകീഴായി മറിഞ്ഞു.