തിരുമിറ്റക്കോട്: പഞ്ചായത്തിലെ കറുകപുത്തൂര്‍, ഇട്ടോണം, ആറങ്ങോട്ടുകര, എന്നിവിടങ്ങളിലും തിരുമിറ്റക്കോടും പരിസര പ്രദേശങ്ങളിലും വഴിവിളക്കുകള്‍ മിഴിയടച്ചു. പ്രദേശത്തെ പാതയോരങ്ങളിലെ വൈദ്യുത തൂണുകളില്‍ സ്ഥാപിച്ച വിളക്കുകള്‍ യഥാവിധി അറ്റകുറ്റപണി നടത്താത്തതാണ് കാരണം. വിളക്കുകള്‍ പലതും പേരിനു മാത്രമാണ് വൈദ്യുത തൂണില്‍ സ്ഥാപിച്ചിരിക്കുന്നത്. ഒട്ടുമിക്ക വഴിവിളക്കുകളും ബള്‍ബ് ഇല്ലാത്തതും ഒടിഞ്ഞുതൂങ്ങി വിഴാറായതുമാണ്. ചിലതില്‍ പക്ഷികള്‍ കൂടുകെട്ടിയിരിക്കുന്ന അവസ്ഥയാണുള്ളത്. കേടുവന്ന വിളക്കുകള്‍ ശരിയാക്കാതെ പകരം ശക്തി കൂടിയ സധാരണ ബള്‍ബാണ് ഘടിപ്പിച്ചിരിക്കുന്നത്. വൈദ്യുത തൂണുകളില്‍ മുഴുവനായും കേടുവന്ന വിളക്കുകളുമുണ്ട്. ചുരുക്കം ചിലതില്‍ മാത്രമാണ് സി.എഫ്.എല്‍, എല്‍.ഇ.ഡി വിളക്കുകള്‍ സ്ഥാപിച്ചിട്ടുള്ളത്. ചില ബള്‍ബുകള്‍ ഫ്യൂസായിട്ടുണ്ട്. വിളക്കുകള്‍ കത്താത്തതിനാല്‍ ഇതുവഴിയുള്ള രാത്രിയാത്ര ദുസ്സഹമായ അവസ്ഥയാണുള്ളത്. കൂടുതലും കാല്‍നടയാത്രക്കാര്‍ക്കാണ് പ്രയാസം.