ഒലവക്കോട്: നഗരത്തിലും പരിസരങ്ങളും കഞ്ചാവുള്‍പ്പെടെ നിരോധിത പുകയിലയുടെയും ലഹരി വസ്തുക്കളുടെയും അനധികൃത വില്‍പന തകൃതിയാവുമ്പോഴും പൊലിസ് പരിശോധനകള്‍ പേരിലൊതുങ്ങുന്നു. സ്‌കൂള്‍- കോളജ്, ബസ്റ്റാന്‍ഡുകള്‍, റെയില്‍വേസ്റ്റേഷന്‍ പരിസരങ്ങളിലും ഇത്തരത്തിലുള്ള ലഹരി വില്‍പന സജീവമായിരിക്കയാണ്.
സ്‌കൂളുകള്‍ക്ക് 200 മീറ്റര്‍ ചുറ്റളവില്‍ പുകയിലയുല്‍പന്നങ്ങള്‍ വില്‍പന നിരോധിത മേഖലയാണെങ്കിലും പലയിടത്തും നിയമം കാറ്റില്‍പറത്തിയാണ് വില്‍പന കൊഴുക്കുന്നത്.
കഞ്ചാവ്, ഹാന്‍സ്, പാന്‍പരാഗ് ബോംബെ പോലുള്ള നിരോധിത പുകയിലയുല്‍പ്പന്നങ്ങള്‍ മറ്റു ലഹരി വസ്തുക്കളും സ്‌കൂള് കോളജ് കുട്ടികളെ ലക്ഷ്യമിട്ട വില്‍പന നടക്കുകയാണ്. തമിഴ്‌നാട്ടിലും പുകയിലയുല്‍പ്പന്നങ്ങള്‍ക്ക് നിരോധനം വന്നതോടെ കേരളത്തില്‍ ഇവക്ക് വിലയേറിയിരിക്കുകയാണ്.
ഒരു പാക്കറ്റ് ഹാന്‍സിന് പെട്ടിക്കടകളില്‍ 50 മുതല്‍ 80 വരെ രൂപയാണ് ഈടാക്കുന്നത്.
ഇതിനുപുറമെ ബോംബെ, പാന്‍പരാഗ്, ചൈനിഗൈനി, കൂള്‍ലിപ് എന്നിവയും തോന്നിയ വിലക്കാണ് യുവാക്കളാല്‍ വില്‍പന നടത്തുന്നത്.
വിദ്യാര്‍ഥികളും അന്യസംസ്ഥാനക്കാരുമാണ് ഇടപാടുകാരില്‍ സിംഹഭാഗവുമെന്നതില്‍ മിക്കകടകളിലും നിയന്ത്രണങ്ങളില്ല.
സ്റ്റേഡിയം സ്റ്റാന്റിന് സമീപത്തും കോയമ്പത്തൂര്‍ റോഡിലുള്ള മിഷന്‍സ്‌കൂള്‍, പി.എം.ജി. സ്‌കൂള്‍ എന്നിവടങ്ങളിലുമാണ് കൂടുതലായും നിരോധിത പുകയിലയുല്‍പന്നങ്ങളുടെ അനധികൃത വില്‍പന നടക്കുന്നതെങ്കില്‍ ടൗണ്‍ റെയില്‍വേ സ്റ്റേഷന്‍ പരിസരം ചുണ്ണാമ്പുത്തറ, മേല്‍പാലം പരിസരം, ഒലവക്കോട് റെയില്‍വെ സ്റ്റേഷന്‍ പരിസരമെന്നിവിടങ്ങളിലാണ് കഞ്ചാവു വില്‍പന നടക്കുന്നത്.
ഇതിനെല്ലാം പുറമെ സ്‌കൂള്‍ പരിസരങ്ങളില്‍ വിദ്യാര്‍ഥികളെ ലക്ഷ്യമിട്ട് മിഠായി രൂപത്തിലും ഐസ് രൂപത്തിലുമുള്ള ലഹരി വസ്തുക്കളുടെ വില്‍പനയും തകൃതിയാണ്.
മാത്രമല്ല ഹാന്‍സ് പോലുള്ള ഉല്‍പനങ്ങള്‍ക്ക് സ്ഥിരമായെത്തുന്നവര്‍ക്ക് പ്രത്യേകം കോഡുകളും നല്‍കിയിട്ടുള്ളതിനാല്‍ വില്‍പന പരസ്യമായിട്ടറിയില്ല.
അന്യസംസ്ഥാനക്കാരുടെ കുത്തകയായ ബീം വില്‍പനയും നടക്കുന്നുണ്ട്. ഇടക്കാലത്തെ പരിശോധനയുടെ ഭാഗമായുള്ള ഇത്തരത്തിലുള്ള ബീം വില്‍പന മിക്കയിടത്തുനിന്നും എടുത്തു മാറ്റിയെങ്കിലും ഇവര്‍ പാക്കറ്റുകളിലാക്കി രഹസ്യ വില്‍പന നടത്തുകയാണ്.
120 മുതല്‍ 480 വരെയുള്ള ഡോസുകളാണ് കൂടുതലായും നടത്തുന്നത്. ലഹരി കൂട്ടുന്നതിനായി കറുപ്പ് നിറത്തിലുള്ള ലഹരി വസ്തുവും കുപ്പിച്ചില്ലുകളും വരെ പൊടിച്ചിട്ടാണ് ഇത്തരം ബീം നിര്‍മാണം നടത്തുന്നത്.
തുടക്കത്തില്‍ കഴിക്കുന്നവര്‍ക്ക് വായ കോടലും തലകറക്കവും വരെ ഉണ്ടാവും പിന്നീട് ഇവര്‍ ഇതിനടിമകളാവുകയാണ്. 50 മുതല്‍ 150 വരെയാണ് ഇത്തരത്തില്‍ ബീം വില്‍പനയുടെ നിരക്ക്. ഇതിലും കൂടുതലായും ഇടപാടുകള്‍ അന്യസംസ്ഥാന തൊഴിലാളികളാണ് എന്നാല്‍ 10 ഗ്രാം, 20 ഗ്രാമിന്റെ ചെറിയ പൊതികളാക്കിയാണ് കഞ്ചാവ് വില്‍പന നടത്തുന്നത്. 100 മുതല്‍ പൊതിയുടെ വലിപ്പത്തിനുസരിച്ചാണ് നിരക്ക്.
നഗരത്തിലെ മിക്കയിടത്തും പെട്ടിക്കടകളിലും നിരോധിത പുകയിലയുല്‍പ്പന്നങ്ങളുടെ വില്‍പന നടക്കുന്നത് രഹസ്യമായാണ്.
പരിശോധനയെ മുന്നില്‍ക്കണ്ട് മിക്ക കടക്കാരും സാധനം സമീപത്തെ കടകളിലോ ഒഴിഞ്ഞ സ്ഥലങ്ങളിലോ സൂക്ഷിച്ചുവച്ച് ആവശ്യാനുസരണം വില്‍പന നടത്തുകയാണെന്നതിനാല്‍ റെയ്ഡു നടന്നാലും ഇവര്‍ പിടിക്കപ്പെടില്ല.