മണ്ണാര്‍ക്കാട്: എടത്തനാട്ടുകര മുണ്ടക്കുന്നിലും, കാപ്പുപറമ്പിലും വീണ്ടും കാട്ടാനകൂട്ടം വ്യാപകമായി കൃഷി നശിപ്പിച്ചു. രാത്രി ഇരുട്ടുന്നതോടെ കാടിറങ്ങുന്ന കാട്ടാനകള്‍ ജനവാസ മേഖലയില്‍ ചിന്നം വിളിച്ചും അലറിയും ജനങ്ങളെ ഭീതിയിലാഴ്ത്തുകയാണ്.
പ്രദേശത്തെ വീടുകളിലെ ജനത്തിന് സൈ്വര്യമായി അന്തിയുറങ്ങാന്‍ കഴിയാത്ത സ്ഥിതിയാണ്. ഞായറാഴ്ച രാത്രി എട്ടരയോടെ കാടിറങ്ങി ജനവാസ മേഖലയിലെത്തിയ കാട്ടാനക്കൂട്ടം കണ്ണില്‍ കണ്ട കൃഷികളെല്ലാം ഇടിച്ചു നിരത്തി. ചേരിയാടന്‍ അബ്ദുറഹിമാന്‍, പി.പി ഉമ്മര്‍, ചുങ്കന്‍ വീരാപ്പു, പി.പി അലി, പി.പി ഉസ്മാന്‍, പി.പി യൂസഫ്, പി.പി സുഹറ, ചുങ്കന്‍ അലവി, വി.പി ആയിഷ, കളത്തുപടിയന്‍ ഉമ്മര്‍, പി.പി സൈനബ, പാറക്കല്‍ ആയിഷ, പാറക്കല്‍ മുഹമ്മദ് തുടങ്ങിയവരുടെ കൃഷികളാണ് ഇന്നലെ കാട്ടാനക്കൂട്ടം നശിപ്പിച്ചത്. ഇതിനോടകം ലക്ഷക്കണക്കിന് രൂപയുടെ കൃഷികളാണ് കാട്ടാനകള്‍ മൂലം ഇവിടെങ്ങളില്‍ നശിപ്പിച്ചിരിക്കുന്നത്. മുണ്ടക്കുന്ന്, ചൂരിയോട്, കാക്കേനിപാടം മേഖലയില്‍ ഇന്നലെ എത്തിയ കാട്ടനകള്‍ കവുങ്ങ്, വാഴ കൃഷികളാണ് ഏറെയും നശിപ്പിച്ചത്.
രണ്ടുമാസത്തെ ഇടവേളക്കു ശേഷമാണ് കഴിഞ്ഞ നാലുദിവസമായി കാട്ടനാകള്‍ കൂട്ടമായി നാട്ടിലിറങ്ങുന്നത്. കാട്ടനകളുടെ പ്രശ്‌നം രൂക്ഷമായതിനെ തുടര്‍ന്ന് റോഡരികുകളില്‍ തെരുവ് വിളക്കുകള്‍ സ്ഥാപിച്ചിട്ടുണ്ടെങ്കിലും അവയൊന്നും തന്നെ കാട്ടാനകളെ തടയാനാവുന്നില്ല.
കാട്ടാനശല്യം രൂക്ഷമായ മുണ്ടക്കുന്നില്‍ വനം വകുപ്പിന്റെ ഔട്ട് പോസ്റ്റ് സ്ഥാപിക്കണമെന്നും, കാട്ടാനകളെ കാടുകയറ്റാന്‍ കുങ്കിയാനകളെ കൊണ്ടുവരണമെന്നുമാണ് ജനകീയാവശ്യം.
കൃഷി നശിച്ച സ്ഥലം കെ.ടി ഹംസപ്പ, പുത്തന്‍കോട്ട് ഉമ്മര്‍, പഞ്ചായത്തംഗം സി. മുഹമ്മദാലി, വനംവകുപ്പ് ഫോറസ്റ്റ് ഓഫിസര്‍ ടി. ഫിറോസ്, നാട്ടുകല്‍ എസ്.ഐ എം. മോഹനകുമാര്‍ സന്ദര്‍ശിച്ചു.