മലപ്പുറം: മാസങ്ങള്‍ നീണ്ട നടപടികള്‍ പൂര്‍ത്തിയാക്കി പ്ലസ്‌വണ്‍ പ്രവേശന നടപടികള്‍ നാളെ അവസാനിക്കുന്നു. ഓണവധിക്കു മുന്‍പേ പ്രവേശനം അവസാനിപ്പിക്കണമെന്ന കടുത്ത നിര്‍ദേശത്തെ തുടര്‍ന്നാണ് വിവിധ ജില്ലകളില്‍ പ്ലസ്‌വണ്‍ സീറ്റുകള്‍ ഒഴിഞ്ഞുകിടന്നിട്ടും പ്രവേശനം അവസാനിപ്പിക്കാന്‍ ഹയര്‍ സെക്കന്‍ഡറി വിഭാഗത്തിന്റെ തീരുമാനം. സീറ്റ് ക്ഷാമം രൂക്ഷമായ ഒന്‍പത് ജില്ലകളില്‍ വര്‍ധിപ്പിച്ച സീറ്റുകള്‍ ഉള്‍പ്പെടെ 18337 സീറ്റുകളിലേക്ക് മൂന്നാം സപ്ലിമെന്‍ഡറി അലോട്ട്‌മെന്റ് നടത്തിയിരുന്നു. മലബാറിലെ ജില്ലകളില്‍ സീറ്റില്ലാതെ നിരവധി പേര്‍ പുറത്തുനിന്നപ്പോഴും വിവിധ ജില്ലകളിലായി പതിനായിരത്തിലധികം മെറിറ്റ് സീറ്റുകള്‍ സംസ്ഥാനത്ത് ഒഴിഞ്ഞ് കിടക്കുകയാണ്.

പ്രവേശനം ലഭിച്ച വിദ്യാര്‍ഥികള്‍ക്കായി ബാക്കി വന്ന 12656 മെറിറ്റ് സീറ്റുകളിലേക്ക് ജില്ലാ, ജില്ലാന്തര, സ്്കൂള്‍, കോമ്പിനേഷന്‍ മാറ്റങ്ങള്‍ക്ക് അപേക്ഷ ക്ഷണിച്ചിരുന്നു. അതിന്റെ ഫലം ഇന്നലെ പ്രസിദ്ധീകരിച്ചു. മാറ്റം ലഭിച്ചവര്‍ നാളെ വൈകീട്ട്് നാലിനകം പ്രേവശനം നേടണമെന്നാണ് നിര്‍ദേശം. വിഭിന്നശേഷി വിഭാഗത്തില്‍പ്പെട്ട അപേക്ഷ നല്‍കിയ വിദ്യാര്‍ഥികള്‍ക്കും സൗകര്യപ്രദമായ സ്ഥലത്തേക്ക് മാറ്റം അനുവദിച്ചുകൊണ്ടുള്ള ഫലവും പ്രസിദ്ധീകരിച്ചിട്ടുണ്ട്. ഈ വിദ്യാര്‍ഥികളും നാളെ വൈകീട്ട് നാലിനകം പ്രവേശനം നേടണം.
വിവിധ അലോട്ട്‌മെന്റുകളില്‍ അപേക്ഷിച്ചിട്ടും ഇതുവരെ പ്രവേശനം ലഭിക്കാത്ത വിദ്യാര്‍ഥികള്‍ക്ക് ഒഴിവുള്ള 12656 മെറിറ്റ് സീറ്റില്‍ പ്രവേശനം നേടാന്‍ ഇന്ന് അവസാനമായി അവസരം നല്‍കിയിട്ടുണ്ട്. ഏകജാലക പ്രവേശനത്തിന്റെ വെബ്‌സൈറ്റ് പരിശോധിച്ച് ഒഴുവുള്ള സ്‌കൂളില്‍ ഇന്ന് വൈകീട്ട് മൂന്നിനകം അപേക്ഷ നല്‍കണം. ഒഴുവ് സംബന്ധിച്ച വിവരങ്ങള്‍ വെബ്‌സൈറ്റില്‍ പ്രസിദ്ധീകരിച്ചിട്ടുണ്ട്. നിലവില്‍ പ്രവേശനം നേടിയ വിദ്യാര്‍ഥികള്‍ക്ക്് അപേക്ഷിക്കാന്‍ സാധിക്കില്ല.

ഒരു വിദ്യാര്‍ഥിക്ക് ഒരു അപേക്ഷ മാത്രമേ സമര്‍പ്പിക്കാന്‍ അനുമതിയുള്ളുവെങ്കിലും ഒഴിവ് കണക്കാക്കി എത്ര സ്‌കൂളുകളെ വേണമെങ്കിലും അപേക്ഷയില്‍ ഉള്‍പ്പെടുത്താം. ഇതിന്റെ അടിസ്ഥാനത്തിലുള്ള റാങ്ക് ലിസ്റ്റ് നാളെ അഡ്മിഷന്‍ വെബ്‌സൈറ്റില്‍ പ്രസിദ്ധീകരിക്കും. അഡ്മിഷന്‍ ലഭിക്കാന്‍ കൂടുതല്‍ സാധ്യതയുള്ള സ്‌കൂള്‍, കോഴ്‌സ് എന്നിവ റാങ്ക് ലിസ്റ്റിലൂടെ മനസിലാക്കി അപേക്ഷകര്‍ 30നു രാവിലെ പത്തിനും 12നും ഇടയില്‍ അഡ്മിഷന്‍ എടുക്കാന്‍ ബന്ധപ്പെട്ട സ്‌കൂളില്‍ എത്തണം. യോഗ്യത സര്‍ട്ടിഫിക്കറ്റ്, വിടുതല്‍ സര്‍ട്ടിഫിക്കറ്റ്, സ്വഭാവ സര്‍ട്ടിഫിക്കറ്റ്, ബോണസ് പോയിന്റ് ലഭിക്കാന്‍ ഉള്‍പ്പെടുത്തിയവയുടെ അസ്സല്‍ രേഖകള്‍ എന്നിവ സഹിതമാണ് അഡ്മിഷന്‍ എടുക്കാന്‍ ഹാജരാവേണ്ടത്. ഇത്തരം സീറ്റുകളില്‍ നാളെ ഉച്ചയ്ക്ക് ഒന്നിനകം പ്രവേശനം പൂര്‍ത്തിയാക്കാനാണ് നിര്‍ദേശിച്ചിരിക്കുന്നത്. ഇതിന്റെ നടപടിക്രമങ്ങള്‍ നാളെ വൈകുന്നേരം അഞ്ചോടെ പൂര്‍ത്തിയാക്കി ഈ അധ്യയന വര്‍ഷത്തെ പ്രവേശന നടപടികള്‍ അവസാനിപ്പിക്കാനാണ് ഹയര്‍ സെക്കന്‍ഡറി ഡയറക്ടറുടെ നിര്‍ദേശം.